ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានផ្តាំផ្ញើដល់ភាគីវៀតណាមថា ក្នុងកាលៈទេសៈនេះ អ្វីដែលគប្បីត្រូវធ្វើជាមួយគ្នា រវាងកម្ពុជា និងវៀតណាម គឺត្រូវរួមគ្នាប្រយុទ្ធប្រឆាំងកូវីដ-១៩។
តាមរយៈវិធានសុខាភិបាល បន្តជំរុញកិច្ចសហប្រតិបត្តិការលើវិស័យសេដ្ឋកិច្ច, ពាណិជ្ជកម្ម,វិនិយោគ និងពិនិត្យមើលលើវិស័យដទៃទៀត។
សម្តេចតេជោប្រមុខរាជរដ្ឋាភិបាលកម្ពុជា បានផ្តាំផ្ញើយ៉ាងដូច្នេះ ក្នុងពេលអនុញ្ញាតឲ្យ ឯកឧត្តម វ៉ូ ក្វាង មិញ (Vu Quang Minh) ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋសង្គម និយមវៀតណាម ចូលជួបសម្តែងការគួរសម និងជម្រាបលា នៅវិមានសន្តិភាព ទីស្តីការនាយករដ្ឋមន្ត្រី នាព្រឹកថ្ងៃទី០៣ កក្កដានេះ។
ក្នុងជំនួបសម្ដែងការគួរសម និងជម្រាបលានេះ ឯកឧត្តម ឯកអគ្គរដ្ឋទូត បានគោរពជម្រាបជូនសម្ដេចថា ឯកឧត្ដមពិតជាមានកិត្តិយសណាស់ ដែលបានមកបំពេញបេសកកម្មការទូតនៅកម្ពុជា។
ក្នុងរយៈពេល៣ឆ្នាំនិង៧ខែកន្លងមក ឯកឧត្ដមសង្កេតឃើញថា ទំនាក់ទំនងរវាងប្រទេសទាំងពីរ មានការរីកចម្រើនរឹងមាំ។ ដោយឡែកវិស័យវិនិយោគ, ពាណិជ្ជកម្ម ក៏មានការកើនឡើងផងដែរ។
ឯកឧត្ដមទូត ក៏បានមានប្រសាសន៍ផងដែរថា៖ នេះគឺជាជោគជ័យ ដែលជោគជ័យនេះ ជាសុភមង្គលរបស់អ្នកការទូត។ ឆ្លៀតឱកាសនេះ ឯកឧត្ដម បានគោរពថ្លែងអំណរគុណជូនចំពោះសម្តេចតេជោ និងថ្នាក់ដឹកនាំកម្ពុជាគ្រប់លំដាប់ថ្នាក់ ក៏ដូចជាប្រជាជន កម្ពុជាផងដែរ ដែលបានចូលរួមចំណែកជួយសហការជាមួយឯកឧត្តមធ្វើឲ្យបេសកកម្មការទូតរបស់ ឯកឧត្ដមនៅកម្ពុជា ទទួលបានជោគជ័យ។
សម្តេចតេជោ ហ៊ុន សែន ប្រមុខរាជរដ្ឋាភិបាល ក៏បានយល់ស្របជាមួយ អ្វីដែលឯកឧត្ដម បានលើកឡើង ហើយក៏បានថ្លែងអំណរគុណ ជូនចំពោះឯកឧត្ដម វ៉ូ ដែលបានប្រឹងប្រែងអស់ពីកម្លាំងកាយចិត្ត បំពេញបេសកកម្មការទូត នៅព្រះរាជាណាចក្រកម្ពុជា ធ្វើឲ្យទំនាក់ទំនង រវាងប្រទេសទាំងពីរ មានការរីកចម្រើន និងកាន់តែរឹងមាំ៕
អត្ថបទ៖ មុត សុទ្ធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
