សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានថ្លែងថា ការងារតាមដានត្រួតពិនិត្យ និងវាយតម្លៃជាប់ជាប្រចាំគឺជាការងារស្នូលបំផុតរបស់រាជរដ្ឋាភិបាលសម្រាប់អាណត្តិទី៧នេះ ហើយវាគឺជាឆន្ទៈខ្ពស់ របស់រាជរដ្ឋាភិបាលក្នុងការធ្វើអភិបាលកិច្ចល្អលើគ្រប់ក្រសួង ស្ថាប័នទំាងអស់។

ថ្លែងក្នុងឱកាសអញ្ជើញបិទសន្និបាតបូកសរុបការងារឆ្នាំ២០២៣ ​និងលើកទិសដៅការងារបន្ត​ឆ្នាំ២០២៤​ របស់ក្រសួងអធិការកិច្ច ​នៅសណ្ឋាគារសុខាភ្នំពេញ ​នាថ្ងៃទី១៣ ខែកុម្ភៈ ឆ្នាំ២០២៤នេះ សម្តេចធិបតី ហ៊ុន ម៉ាណែត ​បានបញ្ជាក់ថា ​ការត្រួតពិនិត្យ ​និងតាមដាននេះគឺជាការងារស្នូល ក្នុងការធ្វើទំនើប កម្មដល់ស្ថាប័នរដ្ឋ ឲ្យក្លាយទៅជារដ្ឋបាលសាធារណៈទំនើប​ប្រកប​ដោយ​សមត្ថភាពខ្ពស់ខ្លាំង វៃឆ្លាត និងស្អាតស្អំ ហើយដើម្បីសម្រេចភារកិច្ចនេះ ការតាមដានត្រួតពិនិត្យ ការសង្កេតការស្រាវជ្រាវលើដំណើរការ ​នៃការអនុវត្តការងារ ដើម្បីវាយតម្លៃលើការទទួលខុសត្រូវ ធ្វើវិនិច្ឆ័យរកគុណសម្បត្តិ និងគុណវបត្តិ។

ជាមួយគ្នានោះដែរ​សម្តេចធិបតី ហ៊ុន ម៉ាណែត ​នាយករដ្ឋមន្រ្តីក៏បានថ្លែងកោតសរសើរចំពោះការ​ខិតខំប្រឹងប្រែង​របស់​ក្រសួងអធិការកិច្ចក្នុងការធ្វើកំណែទម្រង់តាមដានត្រួតពិនិត្យនៅតាមក្រសួង ស្ថាប័ន​នានាផងដែរ ខណៈការខិតខំនេះគឺ​បាន​ឆ្លុះបញ្ចាំង​ឲ្យឃើញកាន់តែច្បាស់​នូវឆន្ទៈដោយ​ឥត ងាក​រេ​របស់រាជរដ្ឋាភិបាល​សម្រាប់​អាណត្តិទី៧នេះ ហើយសម្តេចក៏បានជំរុញឲ្យក្រសួង​អធិការកិច្ចត្រូវ​ធ្វើការតាមដាន​ និង ​ត្រួតពិនិត្យបន្ថែមទៀតផងដែរ ដើម្បីធានានូវប្រសិទ្ធភាពការងារ​របស់រដ្ឋបាលសាធារណៈ៕អត្ថបទ៖ បាន ចក់