មូលនិធិរូបិយវត្ថុអន្តរជាតិ IMF កាលពីថ្ងៃចន្ទ (១២ កុម្ភៈ) បានព្រមានថាការសម្រេចណាមួយដែលធ្វើឡើងអំពីការរឹបអូសទ្រព្យសម្បត្តិបង្កករបស់រុស្ស៊ី គួរតែមាន «ការគាំទ្រផ្នែកច្បាប់គ្រប់គ្រាន់» ដើម្បីជៀសវាងហានិភ័យនាពេលអនាគត។

លោកស្រី ហ្គីតា ហ្គូភីណាត (Gita Gopinath) អគ្គនាយករងទីមួយរបស់មូលនិធិ IMF នៅក្នុងបទសម្ភាសន៍តាមអ៊ីនធឺណិតជាមួយទស្សនាវដ្ដីគោលនយោបាយបរទេស (Foreign Policy) បាននិយាយថា ការសម្រេចអំពីវិធានការដែលត្រូវធ្វើលើទ្រព្យសកម្ម គឺស្ថិតលើប្រទេសដែលកាន់កាប់ទ្រព្យសម្បត្តិនោះ ប៉ុន្តែលោកស្រីបានបដិសេធមិនផ្តល់យោបល់អំពីមធ្យោបាយដែលគេគួរប្រើលើទ្រព្យទាំងនោះទេ។

លោកស្រី ហ្គូភីណាត បាននិយាយថា IMF នឹងវាយតម្លៃផលប៉ះពាល់នៃការសម្រេចណាមួយដែលធ្វើឡើងលើប្រទេសជាសមាជិក ប៉ុន្តែខ្លួននឹងមិនពាក់ព័ន្ធនឹងការសម្រេចនោះទេ។ ហើយវាមានសារៈសំខាន់ណាស់ក្នុងការ «ធ្វើឱ្យប្រាកដថាអ្វីដែលកំពុងធ្វើនេះមានការគាំទ្រផ្នែកច្បាប់គ្រប់គ្រាន់» ដើម្បីកុំឱ្យប្រឈមមុខនឹងហានិភ័យនៅថ្ងៃក្រោយ។

សហរដ្ឋអាមេរិក សហភាពអឺរ៉ុប និងក្រុមប្រទេសទាំងប្រាំពីរ G7 ផ្សេងទៀត បាននឹងកំពុងស្វះស្វែងរកមធ្យោបាយប្រើប្រាស់ទ្រព្យសម្បត្តិរបស់រុស្ស៊ី ដែលត្រូវបានបង្កក ដើម្បីយកទៅជួយគាំទ្រអ៊ុយក្រែន ដែលរងការវាយប្រហារពីការឈ្លានពានរបស់រុស្ស៊ី៕