រដ្ឋបាលខេត្ដសៀមរាប នឹងបើកដំណើរការអនុវត្តសាកល្បងរថយន្តក្រុង ដឹកជញ្ជូនសាធារណៈពី​ក្រុង​រុនតាឯក​តេជោសែន- ក្រុងសៀមរាប និងពីក្រុងសៀមរាប-ក្រុងរុនតាឯកគេរជាសែន ខេត្តសៀមរាប ដោយឥតគិតថ្លៃ នៅថ្ងៃទី១៥ ខែកុម្ភៈ ឆ្នាំ២០២៤ ខាងមុខនេះ។

យោងតាមសេចក្ដីជូនដំណឹង របស់រដ្ឋបាលខេត្តសៀមរាប ចេញផ្សាយ​កាល​ពី​ថ្ងៃទី១២ ខែកុម្ភៈ ឆ្នាំ​២០២៤នេះ បានបង្ហាញថា ផ្អែកតាមការសម្រេចរបស់រាជរដ្ឋាភិបាលក្នុង ការដាក់ដំណើរ​ការ​អនុវត្ត​រថយន្ត​ក្រុងដឹកជញ្ជូនសាធារណៈពីក្រុងរុនតាឯកតេជោសែន-ក្រុងសៀមរាប និង​ពី​ក្រុង​សៀមរាប-ក្រុងរុនតាឯកតេជោសែន ខេត្តសៀមរាប ដើម្បីជួយសម្រួលដល់ការធ្វើដំណើររបស់ បង​ប្អូនប្រជាពលរដ្ឋដែលបានស្ម័គ្រ​ចិត្ត​ចាកចេញ​ពី​តំបន់​រមណីយដ្ឋាន​អង្គរ​ទៅ​រស់​នៅ​តំបន់​អភិវឌ្ឍន៍ រុនតាឯក បំពេញការងារ និងប្រកបរបរចិញ្ចឹមជីវិតប្រចាំថ្ងៃ រដ្ឋបាល​ខេត្តសៀមរាប​នឹង​ដាក់​ឱ្យ​ដំណើការ សាកល្បងរថយន្តក្រុងដឹកជញ្ជូនសាធារណៈពីក្រុងរុនតាឯកតេជោសែន-ក្រុង​សៀមរាប និងពីក្រុង សៀមរាប-ក្រុងរុនតាឯកតេជោសែន ខេត្តសៀមរាប ដោយចាប់ពីថ្ងៃទី១៥ ខែ​កុម្ភៈ ឆ្នាំ២០២៤ តទៅ ដោយឥតគិតថ្លៃ ជូនសាធារណជន និង​ប្រជាពលរដ្ឋ​ក្នុង​ការ​ធ្វើ​ដំណើរ​ទៅ​មក។

ទីតាំងចំណតស្ថិតនៅសួនច្បារព្រះរាជដំណាក់ មាត់ស្ទឹងក្រុងសៀមរាប។ ពេលវេលារួម​មានម៉ោង៦ព្រឹក ម៉ោង៦និង៣០នាទី នៅម៉ោង៧ព្រឹក ម៉ោង៨ព្រឹក ម៉ោង១០ព្រឹក ម៉ៅង​១២​ថ្ងៃ​ត្រង់ ម៉ោង៤រសៀល ម៉ោង៥ និងម៉ោង៦ល្ងាច។ ដោយឡែកនៅទីក្រុងតេជោសែនរុនតាឯក មាន​ទីតាំង​ចំណត នៅផ្សារតំបន់អភិវឌ្ឍន៍រុនតាឯក តាមពេលវេលា រួមមាន នៅម៉ៅង៥ព្រឹក ម៉ោង៦​ព្រឹក ម៉ោង៧ព្រឹក ម៉ោង៨ព្រឹក ម៉ោង១០ព្រឹក ម៉ោង១២ព្រឹក ម៉ៅង៤រសៀល ម៉ោង​៥​ល្ងាច​ និង​ម៉ោង​៦​ល្ងាច។

សេចក្ដីជូនដំណឹងបានបន្ថែមថា ប្រជាពលរដ្ឋ ដែលកំពុងរស់នៅតំបន់អភិវឌ្ឍន៍រុនតាឯក និង​ចូល​រួម​ប្រើប្រាស់រថយន្តក្រុងដឹកជញ្ជូនសាធារណៈ ពីក្រុងរុនតាឯកតេជោសែន-ក្រុងសៀមរាប និង​ពី​ក្រុង​សៀមរាប-ក្រុងរុនតាឯកតេជោសែន ខេត្តសៀមរាប តាមពេលវេលា និង​ទីតាំង​ដែល​បាន​កំណត់​៕