នៅថ្ងៃទី១៣ ខែកុម្ភៈ មុនថ្ងៃទិវានៃក្តីស្រឡាញ់មួយថ្ងៃ ក្រុមអាជីករលក់ផ្កា និងផ្លែឈើ នៅផ្សារធំថ្មី រាជធានីភ្នំពេញ មានភាពមមាញឹកច្រើនក្នុងការវេចខ្ចប់ និងរៀបចំ​ទុកដាក់​ទំនិញ​សម្រាប់​ដាក់​តាំង​លក់​ជូន​ដល់អតិថិជនគ្រប់មជ្ឈដ្ឋាន។

កញ្ញា ស៊ី លីង អាជីវករលក់ដូរនៅផ្សារធំថ្មី បានឲ្យទូរទស្សន៍ព័ត៌មាន ប៊ីធីវី ដឹងនៅព្រឹកថ្ងៃទ១៣ ខែ​កុម្ភៈ ឆ្នាំ២០២៤នេះថា ជារៀងរាល់ឆ្នាំ តម្រូវការទិញផ្កាច្រើនជាងគេ គឺក្នុង​ថ្ងៃ​ទិវា​នៃ​ក្តីស្រលាញ់ ព្រោះពលរដ្ឋ ទិញជូនមនុស្សជាទីស្រឡាញ់ ដូចជាឪពុកម្តាយ គ្រូបង្រៀន និង​មិត្តភ័ក្តិ​ជាដើម ដែលធ្វើឲ្យមានការលក់ដាច់ជាខ្លាំង។ កញ្ញា បានបញ្ជាក់ថា សម្រាប់ឆ្នាំ​នេះ​បាន​ត្រៀម​ផ្កា​ស្រស់​រហូតដល់ចំនួន១ម៉ឺនទងឯណោះ ដោយសារភ្ញៀវធ្វើការកក់ទុកជាបន្តបន្ទាប់។

អ្នកស្រី អានី អាជីករលក់ផ្កាក្បែរនៅផ្សារននេះដែរ បានលើកឡើងថា ពីមួយឆ្នាំទៅមួយឆ្នាំ ការ​លក់​ផ្កា គឺមានការកើនឡើងរហូត ដោយការយល់ដឹងរបស់ប្រជាពលរដ្ឋ ព្រោះសេចក្តី​ស្រឡាញ់​ក្នុង​ទិវា​នេះ មិនមែនសំដៅតែលើបុគ្គលជាសង្សារ ឬប្តីប្រពន្ធប៉ុណ្ណោះទេ ប៉ុន្ដែជា​ការ​បង្ហាញ​ក្ដី​ស្រឡាញ់​ទៅ​កាន់មនុស្សជាទីស្រឡាញ់របស់ខ្លួនជាទូទៅ។

ដោយឡែក អាជីករលក់ផ្លែឈើនៅផ្សារនេះដែរ បានប្រាប់ឲ្យដឹងដែរ ក្រៅពីបុណ្យទាននានា ក្នុង​ឱកាស​ទិវា​នៃក្តីស្រលាញ់មួយនេះ ក៏មានការបញ្ជាទិញផ្លែឈើពីអតិថិជនជាច្រើនដែរនាក់ដែរ ដើម្បី​បង្ហាញពីក្តីស្រឡញ់ រវាងកូន និងឪពុកម្តាយ ក៏ដូចជាការ​បង្ហាញ​អំពី​ទំនាក់​ទំនង​ក្នុង​លក្ខណៈ​ជាដៃគូអាជីវកម្ម និងជាមិត្តភ័ក្តជាដើម។

សូមជម្រាបជូនថា ថ្ងៃ១៤កុម្ភៈ គឺជាទិវានៃសេចក្តីស្រឡាញ់ (Valentine‘s Day) ពលរ​ដ្ឋ​ខ្មែរ​មួយ​ចំនួន​នា​ពេលបច្ចុប្បន្ននេះ បានយល់ច្បាស់ថា ទិវានៃក្តីស្រឡាញ់​នេះ​មិន​មែន​ផ្តោត​សំខាន់​តែ​ទៅ​លើ​គូ​សង្សារទេ ប៉ុន្តែជាការបង្ហាញក្តីគោរពស្រឡាញ់ចំពោះឪពុកម្តាយ ក្រុមគ្រួសារ គ្រូបង្រៀន អ្នក​មានគុណ និងសាច់ញាតិមិត្តភ័ក្តិជាដើម៕ អត្ថបទ៖ ឈិត បូរ៉ាវី