រដ្ឋាភិបាលអង់គ្លេសកាលពីថ្ងៃចន្ទ បានដាក់ទណ្ឌកម្មក្រុមអ្នកតាំងលំនៅអ៊ីស្រាអែល «ជ្រុលនិយម» ដែលខ្លួន បាននិយាយថា បានវាយប្រហារដ៏ហិង្សាលើជនជាតិប៉ាឡេស្ទីន នៅតំបន់វេសបែង(West Bank) ។

រដ្ឋមន្ត្រីការបរទេសអង់គ្លេសលោក ដេវីត កាមេរូន (David Cameron) បានប្រកាសដាក់ទណ្ឌកម្មប្រឆាំងនឹងលោក Moshe Sharvit, Yinon Levi, Zvi Bar Yousef និង លោក Ely Federman ដែលលោកបាននិយាយថា បានចូលរួមជាមួយអ្នកតាំងលំនៅជ្រុលនិយមផ្សេងទៀត ក្នុងការកំណត់គោលដៅ និងវាយប្រហារជនស៊ីវិលប៉ាឡេស្ទីន ហេតុដូច្នេះហើយ «បំផ្លាញសន្តិសុខ និងស្ថិរភាពសម្រាប់ទាំងអ៊ីស្រាអែល និងប៉ាឡេស្ទីន។

លោកកាមេរូន បានថ្លែងថា៖«ទណ្ឌកម្មថ្ងៃនេះ ដាក់កម្រិតលើអ្នកដែលពាក់ព័ន្ធនឹងការរំលោភសិទ្ធិមនុស្សធ្ងន់ធ្ងរបំផុត។ យើងគួរតែច្បាស់អំពីអ្វីដែលកំពុងកើតឡើងនៅទីនេះ។ អ្នកតាំងលំនៅអ៊ីស្រាអែលជ្រុលនិយម កំពុងគំរាមកំហែងប្រជាជនប៉ាឡេស្ទីន ជាញឹកញាប់ដោយការបាញ់កាំភ្លើង និងបង្ខំពួកគេចេញពីដីដែលជាកម្មសិទ្ធិរបស់ពួកគេ»។

«ទង្វើនេះ គឺខុសច្បាប់ និងមិនអាចទទួលយកបាន។ អ៊ីស្រាអែល ក៏ត្រូវតែចាត់វិធានការខ្លាំងជាងនេះ និងបញ្ឈប់ការដោះស្រាយអំពើហិង្សាផងដែរ។ ជាញឹកញាប់ពេក យើងឃើញការប្តេជ្ញាចិត្តដែលបានធ្វើឡើង និងកិច្ចការដែលបានផ្តល់ឲ្យ ប៉ុន្តែមិនត្រូវបានអនុវត្តតាមនោះទេ»។

ក្រុមមន្ត្រី បាននិយាយថា អ្នកតាំងលំនៅ លោកLevy ដែលត្រូវបានដាក់ទណ្ឌកម្មពីមុនដោយសហរដ្ឋអាមេរិកកាលពីដើមខែនេះ និងលោក Sharvit បានប្រើអំពើហឹង្សាលើរាងកាយប្រឆាំងនឹងជនភៀសខ្លួនប៉ាឡេស្ទីន ខណៈដែលលោក Yosef បានបង្កើតប៉ុស្តិ៍ខុសច្បាប់មួយ ដើម្បីយាយីប៉ាឡេស្ទីន ហើយលោក Federman បានជាប់ពាក់ព័ន្ធជាមួយ «ឧប្បត្តិហេតុជាច្រើន» ប្រឆាំងនឹងអ្នកឃ្វាលចៀមប៉ាឡេស្ទីន នៅតំបន់ភ្នំSouth Hebron Hills។