ភ្នំពេញ៖ ឯកឧត្តម សាយ សំអាល់ ឧនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និង​សំណង់ ស្នើសហភាពអឺរ៉ុប ពិនិត្យ​លទ្ធភាព​ធ្វើ​កិច្ច​សហប្រតិបត្តិការ​លើ​ការងារ​ចុះ​បញ្ជី​ដីធ្លី​ទូទាំង​ប្រទេស និងការរៀបចំស្តង់ដារសំណង់នៅកម្ពុជា ដើម្បីជំរុញកំណើនសេដ្ឋកិច្ច និង​លើក​កម្ពស់​ជីវភាពរស់នៅរបស់ប្រជាពលរដ្ឋឱ្យកាន់តែប្រសើរ ។

សំណើនេះធ្វើឡើងក្នុងជំនួបពិភាក្សាការងារជាមួយឯកឧត្តម Igor Driesmans ឯកអគ្គរដ្ឋទូត នៃ​ស្ថានប្រតិភូ​សហភាពអឺរ៉ុប នារសៀលថ្ងៃទី១២ ខែកុម្ភៈ ឆ្នាំ២០២៤ នៅក្រសួងរៀបចំដែនដី។

ឯកឧត្តម សាយ សំអាល់ មានប្រសាសន៍ថា ការងារអាទិភាពរបស់ក្រសួងគឺ ការចុះបញ្ជីដីធ្លី ដើម្បី​រួម​ចំណែក​កាត់បន្ថយវិវាទដីធ្លី និងឈានទៅបង្កើតបរិយាកាសគ្មានវិវាទនៅទូទាំងប្រទេស ដែល​ជា​លទ្ធផល ក្រសួងបានប្រគល់បណ្ណកម្មសិទ្ធិដីធ្លីប្រមាណ ៥លានបណ្ណជូនប្រជាពលរដ្ឋរួចហើយ ហើយ​នៅ​មានប្រមាណ ២លានបណ្ណ កំពុងតែចែកជូនប្រជាពលរដ្ឋជារៀងរាល់ថ្ងៃ ខណៈ​រដ្ឋាភិបាល​ជប៉ុន បានផ្តល់ជំនួយសម្ភារៈសម្រាប់ការចុះបញ្ជីដីធ្លី ហើយក្រសួងសេដ្ឋកិច្ច និង​ហិរញ្ញ​វត្ថុ កំពុងស្វែងរកថវិកាប្រមាណជាង ១០០លានដុល្លារ ដើម្បីចុះបញ្ជី ៥លាន​ក្បាល​ដី​ទៀត​ទូទាំង​ប្រទេស​ឱ្យ​បានចប់សព្វគ្រប់ក្នុងរយៈពេល ២ឆ្នាំខាងមុខ ។

ចំពោះវិស័យសំណង់ ឯកឧត្តមឧបនាយករដ្ឋមន្ត្រី បានបញ្ជាក់ថា គោលដៅសំខាន់ នៃ​ការ​រៀបចំ​ស្តង់ដា​សំណង់​នៅកម្ពុជា គឺដើម្បីជួយដល់កំណើនសេដ្ឋកិច្ច តាមរយៈការប្រើ​ប្រាស់​ឱ្យ​អស់​លទ្ធភាព​នូវធនធានធម្មជាតិដែលមានស្រាប់នៅកម្ពុជា ក៏ដូចជាជំរុញ​ការ​ប្រើប្រាស់​ផលិត​ផល​សំណង់​ក្នុងស្រុក។ ដូចនេះ ក្រសួងបាននិងកំពុងសិក្សាធាតុចូលពីបណ្តាប្រទេសដូចជា អឺរ៉ុប ជប៉ុន និងអាមេរិក ដើម្បី​បង្កើត​ស្តង់ដា​សំណង់​មួយ​ដែល​ឆ្លើយ​តប​ទៅ​នឹង​សក្តានុពល​របស់​កម្ពុជា​។

ឯកឧត្តម សាយ សំអាល់ បានបន្ថែមថាជាមួយគ្នានេះ ក្រសួងបាននិងកំពុងតាក់តែងច្បាប់ចំនួន ៣ គឺច្បាប់ស្តីពីសំណង់ ច្បាប់ភូមិបាល និងច្បាប់ស្តីពីការរៀបចំដែនដី និងនគរូបនីយកម្ម និង​កំពុង​ស្នើ​សុំជំនួយប្រព័ន្ធរូបភាពជាក់លាក់ពីផ្កាយរណប (Satellite Image) តាមរយៈស្ថានីយ៍ JAXA នៃរដ្ឋាភិបាលជប៉ុន ដើម្បីរៀបចំដែនដីស្របតាមទិសនៃការអភិវឌ្ឍសេដ្ឋកិច្ច-សង្គម​ឱ្យ​មាន​ប្រសិទ្ធ​ភាព និងចីរភាព រៀបចំអភិវឌ្ឍទីក្រុង និងរៀបចំលំនៅឋានសមរម្យគួរឱ្យរស់នៅ ។

ជាការឆ្លើយតប ឯកឧត្តមឯកអគ្គរដ្ឋទូត កោតសរសើរ​ដល់​ក្រសួង​ដែល​សម្រេច​បាន​ជោគជ័យ​លើ​ការ​កាត់​បន្ថយវិវាទដីធ្លីទូទាំងប្រទេសបានល្អប្រសើរ ហើយគាំទ្រ​លើ​ការ​សិក្សា​រៀប​ចំស្តង់ដា​សំណង់​នៅ​កម្ពុជា និងបានត្រៀមលក្ខណៈរួចជាស្រេច ដើម្បីផ្តល់ជំនួយបច្ចេកទេស និងជំនួយ​ផ្សេង​ៗ​ឱ្យ​សមស្របនឹងតម្រូវការក្នុងការសិក្សាស្តង់ដារសំណង់នៅកម្ពុជា ពិសេស​ពិនិត្យ​លទ្ធភាព​ធ្វើ​កិច្ច​សហប្រតិបត្តិការជាមួយទីភ្នាក់ងារអវកាសអ៊ឺរ៉ុប (ESA) ដែលមាន​ប្រព័ន្ធ​រូប​ភាព​ជាក់​លាក់​ពី​ផ្កាយរណប៕ អត្ថបទ៖ បាន សុខរិទ្ធិ