លោកវេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្តល់ឈាម នៃក្រសួងសុខាភិបាល តាមរយៈ​BTV ព័ត៌មាន នាព្រឹកថ្ងៃទី១៣ ខែកុម្ភៈ ឆ្នាំ២០២៤នេះ បានអំពាវនាវដល់សប្បុរសជន ចូលរួម​បរិច្ចាគ​ឈាមដោយស្ម័គ្រចិត្ត នាថ្ងៃទី១៤ កុម្ភៈ ក្រោមប្រធានបទ«ផ្តល់ឈាម ផ្តល់កី្តស្រលាញ់»។

លោកវេជ្ជបណ្ឌិត សុខ ប៉ូ បានបន្តថា មជ្ឈមណ្ឌលជាតិផ្តល់ឈាម នឹងរៀបចំទិវាផ្តល់ឈាម ផ្តល់​កី្ត​ស្រលាញ់ នាថ្ងៃទី១៤ ខែកុម្ភៈ ឆ្នាំ២០២៤ស្អែកនេះ ក្នុងគោលបំណងសំខាន់ចំនួន២៖ ទី១.​បង្កើត​ទម្លាប់វប្បធម៌បរិច្ចាគឈាមដោយស្ម័គ្រចិត្ត មិនទទួលកម្រៃ ធ្វើយ៉ាងណាឲ្យមហាជន ប្រជា​ជន​ទូទៅចូលរួមក្នុងកិច្ចការនេះ។ ទី២.ដើម្បីចូលរួមសកម្មភាពមនុស្សធម៌ដ៏ប្រពៃក្នុងសង្គម ជា​ពិសេស​គៀងគរកិច្ចបរិច្ចាគឈាមដោយមិនគិតកម្រៃឲ្យបានច្រើន សម្រាប់យក​ឈាម​ទៅ​ផ្គត់​ផ្គង់​តាម​មនី្ទរ​ទាំងអស់ក្នុងព្រះរាជាណាចក្រកម្ពុជា ដើម្បីធ្វើយ៉ាងណាឲ្យប្រជាពលរដ្ឋយើងទាំងអស់ ទទួល​បានឈាមគ្រប់គ្រាន់ និងមានសុវត្ថិភាព។

ប្រធានមជ្ឈមណ្ឌលជាតិផ្តល់ឈាម នៃក្រសួងសុខាភិបាល បានលើកឡើងទៀតថា ជាទូ​ទៅ​តម្រូវ​ការ​ឈាម​នេះ មានកំណើនរវាង២០%ជារៀងរាល់ឆ្នាំ។ ត្រង់ចំនុចនេះលោកវេជ្ជបណ្ឌិត សុខ ប៉ូ បាន​ពន្យល់ថា មូលហេតុអ្វីបានជាកំណើនតម្រូវការឈាម មានការកើនឡើង? ព្រោះថា ព្រះរាជា​ណា​ចក្រ​កម្ពុជា មានការអភិវឌ្ឍន៍ជឿនលឿនពីមួយឆ្នាំ ទៅមួយឆ្នាំ និងមានការ​ខុស​ប្លែក​ខ្លាំង​ណាស់​។ ដូច្នេះតម្រូវការឈាម គឺជាសូចនាករមួយច្បាស់លាស់ក្នុងវិស័យសុខាភិបាលតែម្តង។ ព្រោះ​ការវះកាត់ ព្យាបាលជំងឺផ្សេងៗ ត្រូវការឈាម នេះជាសូចនាករមួយបញ្ជាក់ថា ការវះ​កាត់​ព្យាបាល​ជំងឺ នៅក្នុងប្រទេសកម្ពុជានេះ អាចធ្វើបាននៅការវៈកាត់ទំនើបធ្ងន់ធ្ងរជាច្រើន។ ដូច្នេះ​បាន​ជា​តម្រូវ​ការ​ឈាម មានការកើនឡើង។

លោកវេជ្ជបណ្ឌិត សុខ ប៉ូ បានបញ្ជាក់ថា មជ្ឈមណ្ឌលជាតិផ្តល់ឈាម ត្រូវ​ការ​ឈាម​១​ប្លោក​រៀង​រាល់​៥​នាទីម្តង។ ទន្ទឹមនឹងនោះមជ្ឈមណ្ឌលជាតិផ្តល់ឈាម ទទួលការផ្គត់ផ្គង់ឈាមរង្វង់៨០% នៃ​តម្រូវការឈាម ទូទាំងប្រទេស មានន័យថាក្នុងមួយថ្ងៃ មជ្ឈមណ្ឌលជាតិផ្តល់ឈាម ផ្គត់​ផ្គង់​ឈាម​ទៅ​កាន់មនី្ទរពេទ្យទូទាំងរាជធានីភ្នំពេញ (មិនថាមនី្ទរពេទ្យសាធារណៈ ឬឯកជន) ជា​មធ្យម​៣៥០ប្លោក ហើយវាក៏អាចប្រែប្រួលពី៣៥០ប្លោក ទៅ៤០០ប្លោក តាមថ្ងៃ នៃតម្រូវ​ការ​ជាក់​ស្តែង​ផង​ដែរ។ ដូច្នេះទាមទារឲ្យមានការប្រឹងប្រែង ចូលរួមពីបងប្អូនជនរួមជាតិ ស្ម័គ្រចិត្ត​បរិច្ចាគ​ឈាម ហើយក៏សូមផ្តាំទៅបងប្អូនប្រជាពលរដ្ឋ ឈាមអត់មានរោងចក្រផលិតនោះទេ មានប្រភព​តែ​មួយ​គត់ ពីមនុស្ស ហើយការបរិច្ចាគឈាម មិនប៉ះពាល់ដល់សុខភាពនោះទេ ហើយថែម​ទាំង​ទទួល​បាន​អត្ថប្រយោជន៍៣យ៉ាងសំខាន់ថែមទៀត ទី១.អត្ថប្រយោជន៍សម្រាប់បុគ្គល, ទី២.សង្គម​ជាតិ និងទី៣.បរលោកជាតិខាងមុខ៕ អត្ថបទ៖ រដ្ឋា