ក្នុងជំនួបជាមួយសម្តេចប្រធានរដ្ឋសភា សមាជិកសភាអាល្លឺម៉ង់ បាន​កោតសរសើរ​កម្ពុជា​ដែល​ធានា​បាននូវសុខសន្តិភាព និងការអភិវឌ្ឍ។

នៅថ្ងៃទី១៣ ខែកុម្ភៈ ឆ្នាំ២០២៣ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា បាន​អនុញ្ញាតឱ្យគណៈប្រតិភូសមាជិកសភាអាល្លឺម៉ង់ ដឹកនាំដោយឯកឧត្តម Johannes Steiniger ចូលជួបសម្តែងការគួរសម និងពិភាក្សាការងារ នៅវិមានរដ្ឋសភា។

នាឱកាសនោះ សម្តេចប្រធានរដ្ឋសភា បានសម្តែងការស្វាគមន៍យ៉ាងកក់ និងថ្លែង​អំណរ​គុណ​ចំពោះ​ការ​បំពេញទស្សនកិច្ច និងជួបពិភាក្សាការងារនាពេលនេះ។ សម្តេចប្រធានរដ្ឋសភា កោត​សរសើរចំពោះអាល្លឺម៉ង់ ដែលតែងជួយគាំទ្រកម្ពុជាតាំងពីទស្សវត្សន៍ទី៦០ និងបាន​បន្ត​ជួយ​គាំទ្រ​ជាថ្មី​ម្តង​ទៀតក្នុងសម័យកាលដែលកម្ពុជាកំពុងមានការអភិវឌ្ឍន៍ដូចបច្ចុប្បន្ន។

ទន្ទឹមនឹងការគាំទ្រនេះ សម្តេចប្រធានរដ្ឋសភា សង្កេតឃើញថាទំនាក់ទំនងកម្ណុជា-អាល្លឺម៉ង់ បាន​រីក​ចម្រើន​ជាលំដាប់ នងដើរតួនាទីសំខាន់ក្នុងការចូលរួមចំណែកក្នុងការអភិវឌ្ឍធនធានមនុស្ស ការ​ពង្រឹងប្រព័ន្ធលទ្ធិប្រជាធិបតេយ្យ។ ក្នុងនោះ ភ្នាក់ងារអភិវឌ្ឍន៍អាល្លឺម៉ង់ បានជំរុញ ស្តារ និង​លើក​កម្ពស់សេដ្ឋកិចកខតាមរយៈស្ថាប័នស្រាវជ្រាវ Think Tank តែងតែចូលរួមអន្តរវិស័យ ក៏ដូច​ជា​លើក​កម្ពស់វិស័យអប់រំ ខណះកន្លង​មក​ភាគី​ទាំង​ពីរ​ធ្លាប់​មាន​ការ​ចុះ​អនុស្សារណៈ​យោគយល់​ស្តីពី​ការ​លើកកម្ពស់សមត្ថភាពមន្រ្តី អ្នកតំណាងរាស្រ្ត ដូចជាការពង្រឹងសមត្ថភាពលើការសន្ទនា និង​ការធ្វើបទបង្ហាញសាធារណៈជាដើម។

ជាការឆ្លើយតប ឯកឧត្តមសមាជិកសភាអាល្លឺម៉ង់ បានថ្លែងការកោតសរសើរ និង​វាយ​តម្លៃ​ខ្ពស់​ចំពោះ​ការ​រីកចម្រើនរបស់កម្ពុជា ថែមទាំងបង្ហាញ​ពី​គោល​បំណង​នៃ​ដំណើរ​ទស្សន​កិច្ច​របស់​គណៈ​ប្រតិភូ​នាឱកាសនេះ ដើម្បីពង្រឹងពង្រីកចំណងមិត្តភាពនិងកិច្ចសហប្រតិបត្តិការរវាងកម្ពុជា-អាល្លឺម៉ង់ ទំាងខាងស្ថាប័ននីតិប្បញ្ញត្តិ និងនីតិប្រតិបត្តិ។

បន្ថែមលើនេះ ឯកឧត្តមសមាជិកសភាអាល្លឺម៉ង់ បានកត់​សម្គាល់​ចំពោះ​កិច្ច​សហ​ប្រតិបត្តិការ​រវាង​សភា​នៃ​ប្រទេសទាំងពីរ ដែលមានការផ្លាស់ប្តូរ​ដំណើរ​ទស្សនកិច្ច​គ្នា​ជា​ញឹកញាប់​នៅ​ក្នុង​រយៈ​ពេល​ចុង​ក្រោយនេះ ដើម្បីចែករំលែកបទពិសោធន៍ និងផ្លាស់ប្តូរទស្សន​ទាន​ពីគ្នាទៅ​វិញ​ទៅ​មក​លើ​ការងារ​សភា៕