ក្រសួងសុខាភិបាលដែលមានមូលដ្ឋាននៅហ្កាហ្សា បាននិយាយកាលពីថ្ងៃចន្ទ (១២ កុម្ភៈ) ថាចំនួនអ្នកស្លាប់របស់ប៉ាឡេស្ទីន ពីការវាយប្រហារដែលកំពុងបន្តរបស់អ៊ីស្រាអែល លើតំបន់ហ្កាហ្សាស្ទ្រីប បានកើនឡើងលើសពី ២៨.៣៤០ នាក់ និងមនុស្ស ៦៧.៩៨៤ នាក់ផ្សេងទៀតបានរងរបួស ចាប់តាំងពីជម្លោះអ៊ីស្រាអែល និងក្រុមហាម៉ាស បានផ្ទុះឡើងកាលពីថ្ងៃទី០៧ ខែតុលា ឆ្នាំមុន។

ក្រសួងបាននិយាយថាក្នុងរយៈពេល ២៤ ម៉ោងកន្លងមកនេះ ជនជាតិប៉ាឡេស្ទីន ១៦៤ នាក់ត្រូវបានសម្លាប់ និងមនុស្សប្រហែល ២០០ នាក់ទៀតរងរបួស។

ទីភ្នាក់ងារសារព័ត៌មាន WAFA របស់ប៉ាឡេស្ទីនបានរាយការណ៍ថា កាលពីព្រឹកព្រលឹមថ្ងៃចន្ទ កងទ័ពអ៊ីស្រាអែលបានបើកការវាយប្រហារយ៉ាងខ្លាំងក្លាទៅលើទីក្រុងរ៉ាហ្វា (Rafah) ភាគខាងត្បូង និងតំបន់ជុំវិញហ្កាហ្សា ដោយបានសម្លាប់ជនជាតិប៉ាឡេស្ទីនជាង ១០០ នាក់ និងរាប់សិបនាក់រងរបួស។

ចាប់តាំងពីការចាប់ផ្តើមនៃជម្លោះអ៊ីស្រាអែល និងក្រុមហាម៉ាសនៅតំបន់ហ្កាហ្សា ប្រហែលពាក់កណ្តាលនៃអ្នកស្រុកបានភៀសខ្លួនទៅកាន់ទីក្រុងរ៉ាហ្វា ដែលនៅជាប់នឹងប្រទេសអេហ្ស៊ីប ដើម្បីជ្រកកោន។

ទីក្រុងព្រំដែន ដែលទទួលបានជំនួយស្បៀងអាហារ ព្រមទាំងថ្នាំពីបរទេស និងទីភ្នាក់ងារអង្គការសហប្រជាជាតិ តាមរយៈផ្លូវឆ្លងកាត់រ៉ាហ្វាមួយនេះ មានមនុស្សច្រើនកុះករស្នាក់នៅក្នុងតង់នៅលើដីកសិកម្ម សាលារៀន និងនៅតាមដងផ្លូវជាដើម៕