ការបង្ហាញខ្លួនលើកដំបូងរបស់ប្រធានាធិបតីសហរដ្ឋអាមេរិកលោក Joe Biden នៅលើបណ្ដាញសង្គម TikTok បានបង្កឲ្យមានចម្រូងចម្រាស ជាពិសេសដោយសារវេទិកាបណ្ដាញសង្គមដែលគ្រប់គ្រងដោយចិននេះ នៅតែត្រូវបានចាត់ទុកជាផ្លូវការថា ជាហានិភ័យផ្នេកសន្តិសុខដោយទីក្រុងវ៉ាស៊ីនតោន។

វីដេអូដែលត្រូវបានបង្ហោះ អំឡុងព្រឹត្តិការណ៍ប្រកួត Super Bowl (ការប្រកួតអាមេរិកកាំងហ្វុតបល ឬបាល់ទាត់អាមេរិកលីគអាជីព) កាលពីថ្ងៃអាទិត្យ (ទី១១ ខែកុម្ភៈ) គឺជាផ្នែកមួយនៃកិច្ចប្រឹងប្រែង ក្នុងយុទ្ធនាការបោះឆ្នោតឡើងវិញរបស់បុរសវ័យ ៨១ឆ្នាំ ដើម្បីបានទៅដល់អ្នកបោះឆ្នោតវ័យក្មេង។

ប៉ុន្តែគណបក្សសាធារណរដ្ឋបានរិះគន់លោក Biden របស់គណបក្សប្រជាធិបតេយ្យថា បានប្រើប្រាស់កម្មវិធីមួយដែលត្រូវបានហាមឃាត់នៅលើឧបករណ៍រដ្ឋាភិបាលសហព័ន្ធសហរដ្ឋអាមេរិក ជុំវិញការបារម្ភថា កម្មវិធីនេះប្រមូលទិន្នន័យឲ្យទីក្រុងប៉េកាំង។ ហើយសូម្បីតែសេតវិមានបានអះអាងថា ខ្លួននៅតែបារម្ភពីបណ្ដាញសង្គម TikTok កាលពីថ្ងៃចន្ទ (ទី១២ ខែកុម្ភៈ)។

បន្ទាប់ពីមានសំណួរម្តងហើយម្តងទៀតអំពីបញ្ហានេះ អ្នកនាំពាក្យក្រុមប្រឹក្សាសន្តិសុខជាតិលោក John Kirby បានឆ្លើយតបទៅកាន់អ្នកសារព័ត៌មានថា៖ «នៅតែមានកង្វល់អំពីសន្តិសុខជាតិ ជុំវិញការប្រើប្រាស់បណ្ដាញសង្គម TikTok នៅលើឧបករណ៍របស់រដ្ឋាភិបាល ហើយមិនមានការផ្លាស់ប្តូរ ចំពោះគោលនយោបាយនោះឡើយ»។

យ៉ាងណាក្ដី សេតវិមានបានឲ្យដឹងថា ច្បាប់បោះឆ្នោតបានហាមឃាត់មិនឲ្យធ្វើអត្ថាធិប្បាយផ្លូវការលើបញ្ហាយុទ្ធនាការនោះឡើយ ប៉ុន្តែបានសង្កត់ធ្ងន់កាន់ទូទៅថា ខ្លួនដឹងពីក្ដីបារម្ភដែលវេទិកាបណ្ដាញសង្គមមួយចំនួន ដូចជា TikTok នេះជាដើម អាចផ្សព្វផ្សាយព័ត៌មានមិនពិត។

សូមបញ្ជាក់ថា បណ្ដាញសង្គម TikTok ត្រូវបានគ្រប់គ្រងដោយក្រុមហ៊ុនចិន ByteDance ហើយត្រូវបានចោទប្រកាន់ពីសំណាក់អ្នកនយោបាយអាមេរិកជាច្រើនថា ជាឧបករណ៍ឃោសនាដែលប្រើប្រាស់ដោយទីក្រុងប៉េកាំង ជាអ្វីដែលក្រុមហ៊ុនបានបដិសេធយ៉ាងដាច់អហង្ការ៕