បាល់ទាត់៖ កីឡាករ ចាន់ វឌ្ឍនាកា បានបើកទំព័រជាកីឡាករក្នុងស្រុកដំបូងដែលរកបាន ៣គ្រាប់ម្នាក់ឯង ឬធ្វើបាន Hat-Trick ក្នុងការប្រកួតពានរង្វាន់មិត្តហ្វូនខេមបូឌានលីគឆ្នាំ២០២១ ស្របពេលត្រូវបានគ្រូបង្វឹកលោក គីម ភក្ដី ដាក់ឲ្យលេងក្នុងជម្រើស ១១នាក់លើកដំបូង ដោយបានជួយក្រុមបឹងកេតយកឈ្នះក្រុមម្ចាស់ផ្ទះខេត្តព្រៃវែង ដោយលទ្ធផល ៣-១ នៅកីឡដ្ឋានខេត្តព្រៃវែងកាលពីចុងសប្ដាហ៍កន្លងទៅ។
ក្នុងជំនួបសប្ដាហ៍ទី៦ នេះ ចាន់ វឌ្ឍនាកា បានប្រើពេល ២នាទីប៉ុណ្ណោះក៏បានស៊ុតបំប៉ោងសំណាញ់ទីខេត្តព្រៃវែង ១គ្រាប់មុនដោយការទាត់បាល់ហ្វ្រីឃីតពីក្រៅប្រអប់គ្រោះថ្នាក់។ បន្ទាប់មកបឹងកេតបានបន្ដដាក់សម្ពាធលើក្រុមម្ចាស់ផ្ទះ តែមិនអាចសម្រេចគ្រាប់បាល់បន្ថែមឡើយ។ ផ្ទុយទៅវិញមុនបញ្ចប់វគ្គទី១ ត្រូវបានខ្សែប្រយុទ្ធវ័យក្មេងគី រីណា បានស៊ុតបំបែកពងមាន់ក្រុមការពារជើងឯកជើងឯកបឹងកេត ១គ្រាប់វិញនៅនាទី៤៥ ទៀតផង។ លុះចូលវគ្គទី២ ការប្រកួតមិនទាន់បាន ១នាទីស្រួលបួលផង កីឡាករមានដើមកំណើតពីខេត្តកំពតដដែល បានស៊ុតបន្ថែមគ្រាប់ទី២ បើកការនាំមុខខេត្តព្រៃវែងជាថ្មីនៅនាទីទី៤៦ មុនរូបគេរកបានគ្រាប់ទី៣ នៅនាទី៧៥។ ៣គ្រាប់នេះបានធ្វើឲ្យខ្សែប្រយុទ្ធជំនាញជើងឆ្វេង វឌ្ឍនាកា បើកកំណត់ត្រាកីឡាករក្នុងស្រុកដំបូងដែលធ្វើបាន Hat-Trick និងជួយឲ្យក្រុមនាគខៀវបឹងកេតស្គាល់ជ័យជម្នះលើកទី២ ក្នុងចំណោម ៥ប្រកួតនាដើមរដូវកាលនេះ។
បន្ទាប់ពីបង្ហាញខ្លួនលើទីលានស្ទើរពេញ ៩០នាទី លោក គីម ភក្ដី បានកោតសរសើរ និងមានសុទិដ្ឋិយនិយមចំពោះ ចាន់ វឌ្ឍនាកា ដោយអះអាងថា ការត្រឡប់មកវិញរបស់ខ្សែប្រយុទ្ធវ័យ ២៦ឆ្នាំរូបនេះគឺជាសញ្ជាមួយល្អក្នុងការជួយក្រុម ដ្បិតកន្លងមក វឌ្ឍនាកា លេងបានតិចដោយផ្អែកលើកម្លាំង និងបច្ចេកទេសរបស់ខ្លួន។ តែក្រោយការប្រកួតជាមួយព្រៃវែងរូបគេបានបង្ហាញថា ខ្លួនបានត្រឡប់មកវិញជាមួយក្រុម និងអាចបន្ដធ្វើការជាមួយគ្នាបន្ដទៀតបាន។ គួរបញ្ជាក់ថា នេះជាលើកដំបូងហើយដែលលោក គីម ភក្ដី បានដាក់ ចាន់ វឌ្ឍនាកា ក្នុងបញ្ជីជម្រើស ១១នាក់ដំបូងក្នុងការប្រកួតជាមួយខេត្តព្រៃវែង ខណៈ ៤ប្រកួតកន្លងមកកីឡាករមានដើមកំណើតពីខេត្តកំពតនេះ បានត្រឹមប្ដូរចូលលេងនៅវគ្គទី២ លើកលែងការប្រកួតជាមួយក្រុមសូលទីឡូអង្គរ វឌ្ឍនាកា បានត្រឹមកម្ដៅសាច់ដុំ តែមិនបានចូលរួមការប្រកួតឡើយ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
