លោក Donald Trump កាលពីថ្ងៃចន្ទ (ទី១២ ខែកុម្ភៈ) បានស្នើឲ្យតុលាការកំពូលរបស់សហរដ្ឋអាមេរិកផ្អាកជាបណ្ដោះអាសន្ននូវសេចក្តីសម្រេចរបស់តុលាការដែលបដិសេធការទាមទាររបស់លោក ដែលថា លោកមានអភ័យឯកសិទ្ធិ ដែលមិនត្រូវបានកាត់ទោសពីបទព្យាយាមកែប្រែលទ្ធផលបរាជ័យ ក្នុងការបោះឆ្នោតឆ្នាំ២០២០ ដោយលើកហេតុផលថា ដោយគ្មានការការពារបែបនេះ «ដូចដែលយើងបានដឹង តំណែងប្រធានាធិបតី នឹងលែងមានហើយ»។

លោក Trump ដែលកំពុងស្វែងតំណែងប្រធានាធិបតីជាថ្មីម្ដង នៅក្នុងការបោះឆ្នោតសហរដ្ឋអាមេរិក នាថ្ងៃទី៥ ខែវិច្ឆិកា បានស្នើសុំឲ្យតុលាការផ្អាកការសម្រេច កាលថ្ងៃទី៦ ខែកុម្ភៈ ដោយក្រុមចៅក្រម ៣រូបរបស់សាលាឧទ្ធរណ៍សហព័ន្ធសហរដ្ឋអាមេរិក District of Columbia Circuit (DC Circuit) ដែលបដិសេធការទាមទារអភ័យឯកសិទ្ធិរបស់លោកពីសវនការ។

នៅក្នុងសេចក្ដីសង្ខេបទៅកាន់តុលាការកំពូល មេធាវីរបស់លោក Trump បានព្រមានថា «ការកាត់ទោសព្រហ្មទណ្ឌរយៈពេលជាច្រើនខែ ចំពោះលោក Trump នៅរដូវកាលបោះឆ្នោត នឹងរំខានយ៉ាងខ្លាំងដល់សមត្ថភាពរបស់លោក Trump ក្នុងការធ្វើយុទ្ធនាការ» តទល់នឹងប្រធានាធិបតីលោក Joe Biden នៅមុនការបោះឆ្នោត។

ពួកគេបានស្នើសុំឲ្យក្រុមចៅក្រមបញ្ឈប់ដំណើរការកាត់ក្តី ដោយរង់ចាំការស្នើរបស់ពួកគេ ចំពោះចៅក្រមពេញអង្គនៅ DC Circuit ដើម្បីពិចារណាករណីនេះឡើងវិញ ហើយប្រសិនបើចាំបាច់ ប្ដឹងឧទ្ធរណ៍ទៅតុលាការកំពូល។ កាលបរិច្ឆេទជំនុំជម្រះក្ដី នៅថ្ងៃទី៤ ខែមីនា សម្រាប់ Trump ក្នុងតុលាការសហព័ន្ធ នាទីទីក្រុង Washington ជុំវិញបទឧក្រិដ្ឋកម្មចំនួន៤ ដែលចូលរួមដោយរដ្ឋអាជ្ញាពិសេសលោក Jack Smith ត្រូវបានពន្យារពេលរួចហើយ ដោយមិនមានកាលបរិច្ឆេទថ្មីនោះទេ៕