ក្រុមនគរបាលបង្ក្រាបកុបកម្មដែលដាក់ពង្រាយនៅព្រំដែននៅរដ្ឋភាគខាងជើង Punjab និងរដ្ឋ Haryana ដើម្បីគ្រប់គ្រងក្រុមកសិកររាប់ម៉ឺននាក់ ដែលដង្ហែក្បួនឆ្ពោះទៅកាន់រដ្ឋធានីញូវដែល្លីនោះ បានឃាត់ខ្លួនក្រុមបាតុករមួយចំនួននៅថ្ងៃអង្គារនេះ ។

ក្រុមនគរបាល បានបាញ់ឧស្ម័នបង្ហូរទឹកភ្នែកលើក្រុមកសិករ និងក្រុមអ្នកគាំទ្ររបស់ពួកគេ អំឡុងបាតុកម្មឆ្ពោះទៅកាន់រដ្ឋធានីប្រទេសឥណ្ឌាមួយនេះ ដែលមានគោលដៅដាក់សំពាធលើរដ្ឋាភិបាលឲ្យគោរពពាក្យសន្យាកាលពីឆ្នាំ ២០២១ ក្នុងការចំណាយបន្ថែមទៀតលើដំណាំកសិកម្ម ។

ការដង្ហែក្បួនដែលជាការដង្ហែក្បួនចុងក្រោយគេនៃបាតុកម្មមានចាប់តាំងពីរយៈពេលជាង ២ឆ្នាំមុនមកម្ល៉េះនោះ បានកើតមានឡើងរយៈពេលប៉ុន្មានខែប៉ុណ្ណោះ មុនការបោះឆ្នោតថ្នាក់ជាតិដែលលោកនាយករដ្ឋមន្រ្តី Narendra Modi នឹងស្វែងរកអាណត្តិទី ៣របស់លោក ក្នុងនោះ ក្រុមកសិករ គឺជាប្លុកបោះឆ្នោតដ៏មានឥទ្ធិពលមួយ ។

កិច្ចប្រជុំដ៏សំខាន់មួយរវាងមេដឹកនាំកសិករ និងរដ្ឋមន្ត្រីសហភាពឥណ្ឌា បានបញ្ចប់ដោយគ្មានដំណោះស្រាយកាលពីល្ងាចថ្ងៃច័ន្ទ ដោយជំរុញឱ្យកសិករដាក់សម្ពាធការតវ៉ានៅទីក្រុងញូវដែល្លី នៅថ្ងៃនេះ។

ទោះបីជាមានការសន្ទនាជាច្រើនម៉ោងក៏ដោយ ភាគីទាំង ២ ពុំបានឈានដល់កិច្ចព្រមព្រៀងលើការទាមទារសំខាន់ៗនោះទេ។ រដ្ឋាភិបាលបាននិយាយថា ការយល់ស្របមួយ ត្រូវបានឈានដល់លើបញ្ហាភាគច្រើន ហើយរូបមន្តមួយក៏ត្រូវបានស្នើឡើងសម្រាប់ការដោះស្រាយបញ្ហាមួយចំនួន តាមរយៈការបង្កើតគណៈកម្មាធិការ ។

ក្រុមសហជីពកសិកម្ម សង្ឃឹមថានឹងបង្ខំរដ្ឋាភិបាលបង្កើតច្បាប់ផ្តល់ការគាំទ្ររដ្ឋខ្ពស់ជាងមុន ការធានាតម្លៃកសិកម្ម ហើយនិងគោរពាក្យសន្យាបង្កើនទ្វេដងប្រាក់ចំណូលរបស់ប្រជាកសិករ ៕