សមាជិកសភាសំខាន់ៗចំនួន ២ក្រុម នៅសភាអ៊ឺរ៉ុប នាថ្ងៃអង្គារ (ទី១៣ ខែកុម្ភៈ) នេះ បានផ្តល់សច្ចាប័នលើកិច្ចព្រមព្រៀងបណ្ដោះអាសន្ន ជុំវិញច្បាប់បញ្ញាសិប្បនិម្មិត (AI) ពោលគឺនៅមុនការបោះឆ្នោត ដោយសភានីតិបញ្ញត្តិ ក្នុងខែមេសាដែលនឹងបើកផ្លូវឲ្យមានច្បាប់ដំបូងរបស់ពិភពលោក ពាក់ព័ន្ធនឹងបច្ចេកវិទ្យា។

ដោយត្រូវបានហៅថា ច្បាប់ AI ច្បាប់ថ្មីនេះមានគោលបំណងកំណត់របាំងការពារ សម្រាប់បច្ចេកវិទ្យាដែលត្រូវបានប្រើក្នុងឧស្សាហកម្មយ៉ាងទូលំទូលាយ ដោយក្នុងនោះរួមទាំងធនាគារ យានយន្ត ផលិតផលអេឡិចត្រូនិក និងក្រុមហ៊ុនអាកាសចរណ៍ ក៏ដូចជាសម្រាប់គោលបំណងសន្តិសុខ និងនគរបាលផងដែរ។

ច្បាប់នេះក៏នឹងគ្រប់គ្រងផងដែរលើគំរូបច្ចេកវិទ្យាមូលដ្ឋាន ឬបច្ចេកវិទ្យា AI បង្កើតឡើងវិញ ដូចកម្មវិធីដែលបង្កើតឡើងដោយក្រុមហ៊ុន OpenAI ដោយកម្មវិធីបច្ចេកវិទ្យារបស់ក្រុមហ៊ុនដែលត្រូវបានគាំទ្រដោយក្រុមហ៊ុន Microsoft មួយនេះ គឺជាប្រព័ន្ធ AI ដែលត្រូវបានបណ្តុះបណ្តាលលើសំណុំទិន្នន័យ ជាមួយនឹងសមត្ថភាពក្នុងការរៀនពីទិន្នន័យថ្មី ដើម្បីបំពេញកិច្ចការផ្សេងៗ។

គួររំលឹកថា បណ្តាប្រទេសសហភាពអឺរ៉ុប (EU) បានផ្តល់ការគាំទ្ររបស់ពួកគេ នៅដើមខែនេះ បន្ទាប់ពីប្រទេសបារាំងទទួលបានសម្បទាន ដើម្បីសម្រាលបន្ទុករដ្ឋបាលពាក់ព័ន្ធនឹងប្រព័ន្ធ AI ដែលមានហានិភ័យខ្ពស់ និងផ្តល់ការការពារឲ្យកាន់តែប្រសើរឡើង សម្រាប់ការសម្ងាត់ខាងអាជីវកម្ម៕