ប្រធានសហជីពកសិកម្មដ៏ធំបំផុតរបស់ប្រទេសបារាំង ឬហៅកាត់ថា FNSEA នៅថ្ងៃអង្គារ (ទី១៣ ខែកុម្ភៈ) នេះ បាននិយាយថា ការតវ៉ាដែលបានកើតមានក្នុងវិស័យនេះ កាលពីខែមុន អាចចាប់ផ្ដើមឡើងវិញ ប្រសិនបើរដ្ឋាភិបាលមិនបានធ្វើកិច្ចការបន្ថែមទៀត ដើម្បីបំពេញតាមការទាមទាររបស់ពួកគេ ដែលចង់បានប្រាក់ឈ្នួល និងលក្ខខណ្ឌការងារប្រសើរជាងមុននោះទេ។

រដ្ឋាភិបាលកំពុងពិភាក្សាជាមួយកសិករ ពាក់ព័ន្ធនឹងការធ្វើឲ្យពួកគេទទួលបានតម្លៃខ្ពស់ជាងមុនពេលលក់ទៅផ្សារទំនើប និងជុំវិញការបន្ធូរបន្ថយបទប្បញ្ញត្តិ និងការិយាធិបតេយ្យ ដែលកសិករបាននិយាយថា ជាបន្ទុកលើអាជីវកម្មរបស់ពួកគេ។ តែយ៉ាងណាក្ដី ប្រធាន FNSEA លោក Arnaud Rousseau បាននិយាយថា ដោយនៅសល់រយៈពេល ១០ថ្ងៃទៀត ដល់ថ្ងៃចាប់ផ្តើមនៃការជួបជុំកសិកម្មជាតិប្រចាំឆ្នាំ រដ្ឋាភិបាលមិនទាន់ធ្វើកិច្ចការឲ្យបានគ្រប់គ្រាន់នោះទេ។

លោក Rousseau បានប្រាប់ស្ថានីយទូរទស្សន៍បារាំង TF1 ថា៖ «យើងមិនបានធ្វើដំណើរក្នុងល្បឿនត្រឹមត្រូវសមរម្យនោះទេ»។ ហើយនៅពេលសួរថា តើកសិករអាចចាប់ផ្តើមឡើងវិញនូវការបិទផ្លូវ ដែលប៉ះពាល់ផ្លូវហាយវេជាច្រើន ក្នុងខែមករា ឬអត់នោះ លោក Rousseau បានឆ្លើយតបថា «ប្រហែលជាអាច»។

សូមរំលឹកថា កសិករនៅទូទាំងទ្វីបអឺរ៉ុប ដែលមានដូចជានៅប៉ូឡូញ អេស្ប៉ាញ អាល្លឺម៉ង់ បែលហ្ស៊ិក និងហូឡង់ជាដើម បានធ្វើបាតុកម្មកាលពីខែមុន ដើម្បីទាមទារប្រាក់បន្ថែម និងលក្ខខណ្ឌការងារល្អប្រសើរជាងមុន៕