គណបក្សប្រឆាំងរបស់ចក្រភពអង់គ្លេស គឺគណបក្សការងារ បានដកការគាំទ្រ ចំពោះបេក្ខជនរបស់គណបក្ស ដែលនឹងក្លាយជាសមាជិកសភា ក្នុងការបោះឆ្នោតពិសេសមួយ បន្ទាប់ពីបេក្ខជនរូបនោះត្រូវបានថតជាប់ពេលកំពុងនិយាយប៉ាន់ស្មានពីការសមគំនិតទុច្ចរិត ពាក់ព័ន្ធនឹងអ៊ីស្រាអែល។

គណបក្សការងារបានប្រកាស កាលពីថ្ងៃចន្ទ (ទី១២ ខែកុម្ភៈ) ថា ខ្លួនបានដកការគាំទ្រចំពោះលោក Azhar Ali ដែលជាបេក្ខជនជាប់ឆ្នោតរបស់គណបក្ស ប្រចាំទីក្រុង Rochdale នៅភាគខាងជើងប្រទេសអង់គ្លេស បន្ទាប់ពីលោកបានលើកឡើងថា អ៊ីស្រាអែលបានធ្វើឲ្យសន្តិសុខរបស់ខ្លួនធូរលុង ដើម្បីឲ្យមានការវាយប្រហារពីសំណាក់ក្រុមហាម៉ាសកាលពីឆ្នាំមុន ក្នុងគោលបំណងយកធ្វើជាហេតុផល ដើម្បីលុកលុយតំបន់ហ្កាហ្សា។

អ្នកនាំពាក្យគណបក្សការងារ បាននិយាយថា គណបក្សបានដកការគាំទ្រចំពោះលោក Ali ហើយនឹងមិនអាចស្វែងរកបេក្ខជនម្នាក់ទៀតបានទេ ព្រោះកាលកំណត់បានកន្លងផុតហើយ ក្នុងការរកអ្នកជំនួសរូបលោក។

លោក Ali បាននិយាយថា សហរដ្ឋអាមេរិកបានព្រមានអ៊ីស្រាអែល នៅ ១ថ្ងៃមុនមានការវាយប្រហារមួយដែលត្រូវបានគ្រោងទុកដោយក្រុមហាម៉ាស ហើយពួកគេបាន «ដកសន្តិសុខដោយចេតនា» ដើម្បីឲ្យពួកគេនឹងមានឱកាស «ធ្វើអ្វីដែលពួកគេចង់បាន»។ នេះបើយោងតាមខ្សែអាត់សំឡេង ដែលត្រូវបានរាយការណ៍ ដោយសារព័ត៌មាន Mail កាលពីថ្ងៃអាទិត្យ (ទី១១ ខែកុម្ភៈ)៕