ការិយាល័យរបស់លោក Mahathir Mohamad បានឲ្យដឹងថា អតីតនាយករដ្ឋមន្ត្រីម៉ាឡេស៊ីវ័យ ៩៧ឆ្នាំរូបនេះ ត្រូវបានបញ្ជូនទៅមន្ទីរពេទ្យជាថ្មីម្តងទៀត ដោយមានការបញ្ជាក់ពីសេចក្ដីរាយការណ៍របស់ប្រព័ន្ធផ្សព្វផ្សាយ បន្ទាប់ពីអតីតអ្នកកាន់តំណែងនាយករដ្ឋមន្ត្រីជាង ២ទសវត្សរ៍ បានខកខានឡើងសវនាការ នៅតុលាការ នៅថ្ងៃអង្គារ (ទី១៣ ខែកុម្ភៈ) នេះ។

បុរសវ័យជាង ៩០ឆ្នាំរូបនេះ បានចេញ និងចូលមន្ទីរពេទ្យ ក្នុងរយៈពេលប៉ុន្មានឆ្នាំចុងក្រោយនេះ។ លោកមានប្រវត្តិមានបញ្ហាបេះដូង ហើយបានទទួលការវះកាត់ប្ដូរបេះដូង។ លោក Mahathir ត្រូវបានគ្រោងនឹងចូលរួមក្នុងដំណើរការតុលាការដែលទាក់ទងនឹងបណ្តឹងរបស់លោកប្រឆាំងនឹងឧបនាយករដ្ឋមន្ត្រី លោក Ahmad Zahid Hamidi ពាក់ព័ន្ធនឹងការចោទប្រកាន់ថា បានធ្វើសេចក្តីថ្លែងការណ៍បង្ខូចកេរ្តិ៍ឈ្មោះដោយចោទសួរពីប្រភពដើមនៃជាតិសាសន៍របស់អតីតមេដឹកនាំរូបនេះ។

ចៅក្រមបានលើកពេលសវនាការទៅថ្ងៃទី១៩ ខែកក្កដា បន្ទាប់ពីមេធាវីរបស់លោក Mahathir បានប្រាប់តុលាការថា កូនក្តីរបស់ខ្លួនត្រូវបានអនុញ្ញាតឲ្យចូលព្យាបាលនៅវិទ្យាស្ថានជាតិបេះដូង ចាប់តាំងពីថ្ងៃទី២៦ ខែមករា។ ចំណែកមេធាវីរបស់លោក Ahmad Zahid បានស្នើថា ការកាត់ក្តីគួរចាប់ផ្តើមនៅខែតុលា ប៉ុន្តែចៅក្រមបានបដិសេធសំណើនេះ ហើយបានស្នើឲ្យកំណត់កាលបរិច្ឆេទលឿនជាងនេះ៕