ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច រួមទាំងថ្នាក់ដឹកនាំក្រសួង និងអាជ្ញាធរដែនដី បាន​ចូលរួម​ក្នុង​ពិធីសំណេះសំណាល សួរសុខទុក្ខ និងនាំយក​អំណោយ​ជូន​ជនរង​គ្រោះ​មាន​វិបល្លាស​ស្មារតី ស្នាក់នៅមជ្ឈមណ្ឌលថែទាំ និងស្ដារនីតិសម្បទា ជនមានវិបល្លាសស្មារតី ដែលស្ថិត​នៅ​ក្នុង​ភូមិបាគូ ឃុំបាគូ ស្រុកកណ្ដាលស្ទឹង ខេត្តកណ្ដាល។

ភ្ជាប់ជាមួយទិវានៃក្ដីស្រលាញ់ ១៤ កុម្ភ: ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីត​យុទ្ធជន និងយុវនីតិសម្បទា រួមទាំងថ្នាក់ដឹកនាំក្រសួង និងអាជ្ញាធរដែនដី បាន ទៅជួប​សំណេះ​សំណាល​សួរ​សុខទុក្ខ និងនាំយកអំណោយសប្បុរសធ៌ម ជូនជនមាន​វិបល្លាស​ស្មារតី​ដែល​រស់​នៅ​ និង​ទទួល​ការព្យាបាលនៅមជ្ឈមណ្ឌលថែទាំ និងស្ដារនីតិសម្បទា ជនមានវិបល្លាសស្មារតី។ ការ​ជួប​សំណេះ​សំណាលនេះ ធ្វើឡើងនៅរសៀលថ្ងៃទី ១៣ ខែកុម្ភ: ឆ្នាំ ២០២៤។

ឯកឧត្តមរដ្ឋមន្ត្រី បានកោតសសើរចំពោះកិច្ចការកន្លងរបស់មជ្ឈមណ្ឌល និងលើកទឹកចិត្ត​ឱ្យ​ប្រធាន​មជ្ឈ​មណ្ឌល ក៏ដូចជាបុគ្គលិកក្នុងមជ្ឈមណ្ឌលទាំងអស់ ត្រូវបន្តយកចិត្តទុកដាក់ថែទាំ ផ្ដល់​សេវា​ព្យាបាល ជូនជនរងគ្រោះ ដោយភ្ជាប់ជាមួយការទទួលខុសត្រូវខ្ពស់។

ក្នុង​ឱកាសដដែលនេះ ឯកឧត្តម រដ្ឋមន្ត្រីក៏បានថ្លែងអំណរគុណ ដល់សប្បុរសជន អង្គការ​ដៃគូ​ជាតិ និង​អន្តរជាតិ ក៏ដូចជាអាជ្ញាធរដែលបានចូលរួមជួយដល់ជនរងគ្រោះមានវិបល្លាសស្មារតី។ ឯកឧត្តម​រដ្ឋមន្ត្រីក៏បានទទួលយកសំណើរ ពីប្រធានមណ្ឌល លើការស្នើសុំអ្នកថែទាំបន្ថែម និង​គ្រូ​ពេទ្យ​ជំនាញ​បន្ថែមផងដែរ។

ក្នុងឱកាស​ជួបសំណេះសំណាលនេះ លោក ឌុំ រតនៈឧត្តម ប្រធានមជ្ឈមណ្ឌថែទាំ និងស្តារនីតិ​សម្បទា​ជន​វិបល្លាស បានលើកឡើងថា បច្ចុប្បន្នមជ្ឈ​មណ្ឌល​មាន​ជន​វិបល្លាស​ស្មារតី​កំពុង​ស្នាក់​នៅ​សរុប​ចំនួន ២៤០នាក់ ក្នុងនោះ ជនវិបល្លាសដែលមានស្ថានភាពប្រសើរ ៧៦នាក់ ស្ថានភាព​មធ្យម​មាន​ចំនួន ១៤៩នាក់ និងស្ថានភាពធ្ងន់ធ្ងរ មានចំនួន ១៥នាក់។

ជាការសម្រេច​បានក្នុងរយ:ពេលប៉ុន្មានឆ្នាំមកនេះ មជ្ឈមណ្ឌលក៏បាន បញ្ជូនជនរងគ្រោះ​ដែល​ជា​សះស្បើយ​ចំនួន ២៣នាក់ ទៅកាន់ក្រុមគ្រួសារបន្តថែទាំផងដែរ។

ក្នុងពេល​បច្ចុប្បន្ន មជ្ឈមណ្ឌលបានផ្តល់កម្មវិធីស្តារនីតិសម្បទាដល់ជនវិបល្លាសស្មារតីដូចជា៖ បង្រៀន​អក្ខរកម្ម គូរគំនូរ ធ្វើក្រណាត់ជូតជើង ធ្វើសាប៊ូ ធ្វើកសិកម្ម សម្អាងកាយ និង​កម្ម​វិធី​ប្រឹក្សា​យោបល់​អ​ប់រំសុខភាពផ្លូវចិត្តជាមួយជនវិបល្លាសស្មារតី។

គួរបញ្ជាក់​ថា មជ្ឈមណ្ឌលនេះ ត្រូវបានដាក់សម្ពោធ​ឱ្យ​ចាប់ផ្ដើម​ដំណើ​រ​ការ​ជួយ​ដល់​ជន​មាន​វិបល្លា​សស្មា​រតីកាលពីខែ កញ្ញា ឆ្នាំ ២០១៩មកម្លេះ៕ អត្ថបទ៖ គឹមហុក