​​ប្រណាំង​រថយន្ត៖ ​កីឡាករ​ហូ​ឡង់​របស់​ក្រុម Red Bull, Max Verstappen បាន​ពន្លាត​ពិន្ទុ​នាំមុខ​បន្ថែម​ក្នុង​តារាង​ជើងឯក​ពិភពលោក ​ពីលើ​កីឡាករ​ជើងឯក​ពិភពលោក ៧សម័យ Lewis Hamilton ក្រោយ​ឈ្នះ​ការប្រកួត​នៅ​ទីលាន​ប្រទេស​អូទ្រីស​ ២សប្តាហ៍​ជាប់​គ្នា​។

​​Verstappen ទើបតែ​បាន​យកឈ្នះ​ការប្រកួត​នៅ​ទីលាន​ដដែល​នេះ​សប្តាហ៍​មុន ហើយ​នៅតែ​បន្តធ្វើ​បានល្អ​ទៀត​ ដោយ​យកឈ្នះ​ការប្រកួត​យក​ទី​ចេញដំណើរ​កាលពី​ថ្ងៃ​សៅរ៍ និង​ការប្រកួត​ថ្ងៃអាទិត្យ​ម្សិលមិញ​ ចេញដំណើរ​មុខ​គេ​តាំងពី​ដើមទី​រហូតដល់​ទី​ព្រ័ត្រ ៧១ជុំ​។ ​លេខ២ ក្នុងការ​ប្រកួត​បាន​ទៅ​កីឡាករ​ហ្វាំ​ង​ឡង់ Valtteri Bottas​ និង​លេខ៣ កីឡាករ​អង់គ្លេស ​Lando Norris របស់​ក្រុម McLaren រុញ​ទំលាក់​អ្នកការពារ​ជើងឯក Lewis Hamilton នៅក្រៅ​វេទិកា​កិត្តិយស​បាន​ត្រឹម​លេខ៤​។

​​នេះ​ជា​ជ័យជំនះ​ទីលាន​ទី៥ ហើយ​សំរាប់ Max Verstappen នៅ​រដូវ​កាល​នេះ​ និង​ធ្វើឱ្យ​អោយគេ​បង្កើន​ការនាំ​មុខ​ក្នុង​តារាង​ជើងឯក​ដល់ ៣២ពិន្ទុ​ពីលើ Lewis Hamilton ខណៈ​លេខ៣ គឺ​កីឡាករ​ម៉ិ​ក​ស៊ិ​ក Sergio Perez របស់​ក្រុម Red Bull​។ ​​ទីលាន​បន្ទាប់ពី​អូទ្រីស​នេះ​គឺ​បន្តទៅ​ទីលាន Silverstone ចក្រភព​អង់គ្លេស​ថ្ងៃទី១៨ ខែកក្កដា​នេះ​៕

​អត្ថបទ​៖​នាង សុភា​វុ​ធ