សិស្សានុសិស្សរាប់រយនាក់ មកពីបណ្តាវិទ្យាល័យនានាក្នុងរាជធានីភ្នំពេញ និងខេត្តកំពង់ស្ពឺ នៅព្រឹកថ្ងៃទី១៤ ខែកុម្ភៈ ឆ្នាំ២០២៤នេះ បាននាំគ្នាទៅទស្សនកិច្ច នៅវិមានឈ្នះ ឈ្នះ ដើម្បី​ស្វែង​យល់បន្ថែម ពីដំណើរការអនុវត្តនយោបាយឈ្នះ ឈ្នះខណៈវិមាននេះបា​​ន​ក្លាយ​ជា​មជ្ឈ​មណ្ឌល​សិក្សាដ៏មានសារសំខាន់សម្រាប់សិក្សាស្រាវជ្រាវអំពីប្រវត្តិសាស្ត្រជាតិ និងរបត់ដឹកនាំ​ប្រទេស​កម្ពុជា។

សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានប្រសិទ្ធនាម​«សារមន្ទីរ​តេជោ​សន្តិភាព​» Techo Peace Museum ដោយសារមន្ទីរនេះស្ថិតនៅក្នុងវិមានឈ្នះ ឈ្នះ ដែល​បាន​រួម​ចំណែក​ផ្តល់ព័ត៌មានលម្អិតបន្ថែមទៀតដល់ គណៈប្រតិភូជាតិ និងអន្តរជាតិ ក៏ដូចជា​សាធារណ​ជន ទាក់ទងនឹងដំណើរជាតិកម្ពុជា ពិសេសពាក់ព័ន្ធ​នឹង​ជីវិត​ដឹក​នាំ​របស់​សម្ដេច​អគ្គ​មហា​សេនាបតីតេជោ ហ៊ុន សែន តាំងពីចំណុចចាប់ផ្ដើមនាថ្ងៃទី២០ ខែមិថុនា ឆ្នាំ១៩៧៧ និង​ដំណើរ​អនុវត្ត​នយោបាយឈ្នះ ឈ្នះ នាំឲ្យមានការបញ្ចប់​សង្រ្គាម​ស៊ីវិល​ទាំង​ស្រុង​នៅ​កម្ពុជា​នា​ថ្ងៃ​ទី​២៩ ខែធ្នូ ឆ្នាំ១៩៩៨ ឈានដល់ការអភិវឌ្ឍបង្កើតសមិទ្ធផល​លើ​គ្រប់វិស័យ​រហូត​ដល់​សព្វ​ថ្ងៃ​នេះ​។

 «សារមន្ទីរតេជោសន្តិភាព»នេះបានផ្ទុកនូវរាល់ឯកសារទាំងអស់ទាក់ទងនឹងនយោបាយឈ្នះ ឈ្នះ ដែលជានិមិត្តរូបឲ្យការបង្រួបបង្រួមជាតិ និងបិទបញ្ចប់នូវភ្លើងសង្គ្រាមទាំងស្រុងនៅកម្ពុជា ហើយបាននាំកម្ពុជាមាននូវសុខសន្តិភាព និងការឯកភាពជាតិពេញលេញ ព្រមទាំង​មាន​ការអ​ភិវឌ្ឍ​រហូតដល់សព្វថ្ងៃនេះ។

«សារមន្ទីរតេជោសន្តិភាព»នេះ នឹងផ្តល់ព័ត៌មានកាន់តែពិស្តារបន្ថែមទៀតទាក់ទិន​នឹង​នយោបាយ​ឈ្នះ ឈ្នះ និងប្រវត្តិសាស្ត្រសំខាន់ៗជាច្រើនទៀតដូចជារូបគំនូរ និងរូបថត ស្តីពីប្រវត្តិ​នៃ​ទិវា​ចងចាំ​ដំណើរឆ្ពោះទៅការផ្តូលរលំរបបប្រល័យពូជសាសន៍ប៉ុលពតថ្ងៃទី ២០ ខែមិថុនា ឆ្នាំ១៩៧៧ និងសម្ភារៈផ្សេងៗ របស់សម្តេចតេជោហ៊ុន សែន អតីតនាយករដ្ឋមន្រ្តីនៃកម្ពុជា ដូចជា រថយន្ត វិទ្យុ ទូរដាក់សំភារៈ ដែលបានប្រើប្រាស់កាលពីទស្សវត្សទី៧០ រហូតមក​ដល់​ទស្សវត្ស​ទី៨០ និង បង្ហាញពីភូមិសាស្ត្រនៃការអនុវត្ត នយោបាយឈ្នះឈ្នះ របស់សម្តេចតេជោ ហ៊ុនសែន ក្នុងយោធភូមិភាគទី៣ ទី៤ និងទី៥ ក៏ដូចជាតំ​បន់​សមិទ្ធផល​បង្ហាញ​ពី​សមិទ្ធផល​សំខាន់ៗ​របស់ជាតិ ដំណើរការសាងសង់វិមានឈ្នះ ឈ្នះ និងសកម្មភាពរបស់កងទ័ពមួកខៀវកម្ពុជានៅក្នុងបេសកកម្ម ថែរក្សាសន្តិភាព​របស់​អង្គការ​សហប្រជាជាតិ​។

ក្រោយសម្ពោធ​ដាក់​ឲ្យដំណើរការមានប្រតិភូជាតិ និងអន្តរជាតិ ជិតពីរលាននាក់ហើយ ដែលបានទៅ ទស្សនកិច្ច និងសិក្សាស្វែងយល់អំពីប្រវត្តិសាស្រ្តពិត​នៅវិមាន​ជា​ប្រវត្តិសាស្រ្ត​មួយ​នេះ៕ អត្ថបទ៖ បាន ចក់