ភ្នំពេញ៖ ក្រសួងរៀបចំដែនដី នគរូបនីយកម្ម និងសំណង់ និងក្រសួងសាធារណការ និង​ដឹក​ជញ្ជូន កំពុងសិក្សាគម្រោង ក្នុងការកែប្រែនូវមុខមាត់រាជធានីភ្នំពេញ ឲ្យកាន់​តែ​មាន​សោភ័ណ​ភាព និងទាក់ទាញភ្ញៀវទេសចរបរទេស មកលេងកម្សាន្តនៅកម្ពុជាឲ្យកាន់តែច្រើនឡើង និង​ជំរុញ​កំណើនសេដ្ឋកិច្ច ។

ក្នុងកិច្ចប្រជុំស្តីពី ការរៀបចំហេដ្ឋារចនាសម្ព័ន្ធក្នុងរាជធានីភ្នំពេញ នៅរសៀលថ្ងៃទី១៣ ខែកុម្ភៈ ឆ្នាំ​២០២៤ ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និង​សំណង់ មានប្រសាសន៍ថា រាជធានីភ្នំពេញ ជាទីក្រុងពាក់កណ្ដាលចាស់ និងពាក់កណ្ដាលថ្មី ហើយ​ការកែលម្អនេះ ក៏ត្រូវនាំយកអ្វីដែលថ្មី ដែលជាធាតុចូលមកពីប្រទេសផ្សេងៗមកអភិវឌ្ឍន៍ ប៉ុន្តែ​ត្រូវថែរក្សានូវសមិទ្ធផលពីជំនាន់ចាស់ៗផងដែរ ។

ឯកឧត្តមបានបន្តថា ដោយជំហានដំបូង អាចជ្រើសរើសយកផ្លូវចំនួន ៣ខ្សែ ក្នុងនោះ​មាន​ផ្លូវ​ត្រសក់​ផ្អែម ផ្លូវវេងស្រេង និងផ្លូវហាណូយ សម្រាប់ការលម្អ និងរៀបចំ ហើយអាច​អនុវត្តន៍​បន្តិច​ម្ដង​ៗ នៅក្នុងអាណត្តិនេះ បើទទួលបានជោគជ័យ អាចនឹង​ចាប់​ផ្ដើម​អនុវត្តន៍​តាម​បណ្ដា​ខេត្ត​ផ្សេង​ៗ​ទៀត ហើយផ្លូវដែលត្រូវកែលម្អនេះ ត្រូវមានការធ្វើចិញ្ចើម គឺត្រូវរៀប​ខឿន​ផ្លូវ​ប្រកប​ដោយ​ស្ដង់ដារ មានផ្លូវដើរបានស្រួល សម្រាប់អ្នកថ្មើរជើង...។

ឯកឧត្តម លី រស្មី រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បាន​លើក​ឡើង​ថា សម្រាប់ជាទស្សនទាន ក្នុងការស្ថាបនា និងកែលម្អផ្លូវទីក្រុងនេះ គឺជាផ្លូវមានសុវត្ថិភាព និង​គុណ​ភាព​ខ្ពស់, ផ្លូវមានគុណភាពធន់នឹងការប្រែប្រួលអាកាសធាតុ, កាត់​បន្ថយ​បញ្ហា​កក​ស្ទះ​ចរាចរណ៍ និងជាផ្លូវដែលគេអាចដើរលេងកម្សាន្ត និងជិះកង់បាន ។

ឯកឧត្តមបានបន្តថា មិនត្រឹមតែប៉ុណ្ណោះ គឺមានរៀបចំឲ្យមានចំណតរថយន្ត នៅតាម​ទី​សាធារណៈ​, មានចំណតរថយន្តក្រុងសាធារណៈ, លើកកម្ពស់ជីវភាពអាជីកម្មតាមដងផ្លូវ និង​មាន​ភាពទាក់ទាញ ដោយអាចទាក់ទាញភ្ញៀវទេសចរឲ្យដើរកម្សាន្ត នៅក្នុង​ព្រឹត្តិ​ការណ៍​បុណ្យ​ជាតិ និងបុណ្យផ្សេងៗ រួមទាំងការដាក់ស្លាកសញ្ញា ឬអក្សរបង្ហាញពីទីតាំងប្រវត្តិសាស្ត្រ ដើម្បី​ឲ្យ​ភ្ញៀវ​ទេសចរបានដឹងជាដើម ។

ពាក់ព័ន្ធនឹងការកែលម្អសោភ័ណភាពទីក្រុងនេះ ឯកឧត្តម សាយ សំអាល់ កាលពីថ្ងៃទី១២ ខែ​កុម្ភៈ ឆ្នាំ២០២៤ ក៏បានស្នើទៅកាន់សហភាពអឺរ៉ុប តាមរយៈឯកឧត្តម Igor Driesmans ឯក​អគ្គ​រដ្ឋ​ទូត​សហភាពអឺរ៉ុបប្រចាំកម្ពុជា (EU) មានកិច្ច​សហប្រតិបត្តិការ​លើ​ការ​រៀបចំ​ស្តង់ដារ​សំណង់​នៅ​កម្ពុជា ដើម្បីជួយដល់កំណើនសេដ្ឋកិច្ច តាមរយៈការ​ប្រើប្រាស់​ឱ្យ​អស់​លទ្ធភាព​នូវ​ធន​ធាន​ធម្មជាតិ ដែលមានស្រាប់នៅកម្ពុជា ក៏ដូចជាជំរុញការប្រើប្រាស់ផលិតផលសំណង់ក្នុងស្រុក ដោយ​ក្រសួងបាននិងកំពុងសិក្សាធាតុចូលពីបណ្តាប្រទេសដូចជា អឺរ៉ុប ជប៉ុន និងអាមេរិក ដើម្បី​បង្កើត​ស្តង់ដារសំណង់មួយ ដែលឆ្លើយតបទៅនឹងសក្តានុពលរបស់កម្ពុជា៕ អត្ថបទ បាន សុខរិទ្ធិ