អ្នកនាំពាក្យក្រសួងយុត្តិធម៌ ថ្លែងថា រយៈពេលជាង ២០ថ្ងៃមានសំណុំរឿងអត្រានុកូលដ្ឋានតាមបណ្តាសាលាដំបូងរាជធានី-ខេត្តចំនួនជាង៤០ភាគរយត្រូវបានដោះស្រាយ ខណៈប្រជាពលរដ្ឋដែលមានបញ្ហាលើសំណុំរឿងពាក់ព័ន្ធហើយកំពុងស្វែងរកដំណោះស្រាយ អាចដាក់ពាក្យបណ្តឹងទៅកាន់អាជ្ញាធរជាតិដោះស្រាយវិវាទក្រៅប្រព័ន្ធតុលាការ។
ថ្លែងប្រាប់ BTV នៅថ្ងៃទី១៤ ខែកុម្ភៈ ឆ្នាំ២០២៤ ឯកឧត្តម ជិន ម៉ាលីន រដ្ឋលេខាធិការ និងជាអ្នកនាំពាក្យក្រសួងយុត្តិធម៌ បានឱ្យដឹងថា បន្ទាប់ពីមានការបង្កើតយុទ្ធនាការជំរុញ និងពន្លឿនការដោះស្រាយរឿងក្តីនៅតាមតុលាការ និងយុទ្ធនាការត្រួតពិនិត្យ និងដោះស្រាយភាពមិនប្រក្រតីនៅតាមតុលាការ កាលពីដើមខែមករា ឆ្នាំ២០២៤ កន្លងទៅ គិតមកទល់ពេលនេះវឌ្ឍនភាពនៃយុទ្ធនាការនេះបានរួមចំណែកពន្លឿនក្នុងដោះស្រាយសំណុំរឿងរដ្ឋប្បវេណីជាច្រើនជាបន្តបន្ទាប់។ ក្នុងនោះមានសំណុំរឿងរដ្ឋប្បវេណីជាង ៤០ភាគរយ នៃសំណុំរឿងសរុបជាង ៨ពាន់ដែលបានដាក់ពាក្យមុន និងក្រោយយុទ្ធនាការនេះ ត្រូវបានដោះស្រាយរួចរាល់។
ឯកឧត្តមបញ្ជាក់ថា រយៈពេល២៣ថ្ងៃកន្លងទៅយុទ្ធនាការទាំងពីរខាងលើបានជំរុញ និងពន្លឿនឱ្យដំណើរការនីតិវិធីសំណុំរឿងតាមបណ្តាសាលាដំបូងរាជធានី-ខេត្ត មានសម្ទុះលឿនជាងមុន ដូចជាសំណុំរឿងអត្រានុកូលដ្ឋាន សំណុំរឿងសំណងរដ្ឋប្បវេណី និងសំណុំរឿងបទល្មើសចរាចរណ៍ជាដើម។
ទន្ទឹមនឹងយុទ្ធនាថ្មីដែលកំពុងដំណើរការ អ្នកនាំពាក្យរូបនេះ បានឱ្យដឹងដែរថា ដើម្បីកាន់តែពង្រឹងប្រសិទ្ធភាពបន្ថែមលើវិស័យយុត្តិធម៌ រាជរដ្ឋាភិបាលបានបង្កើតអាជ្ញាធរជាតិដោះស្រាយវិវាទក្រៅប្រព័ន្ធតុលាការ ដែលអាជ្ញាធរជាតិនេះនឹងអនុញ្ញាតឱ្យប្រជាពលរដ្ឋជួបបញ្ហានីតិវិធីនៃសំណុំរឿងរបស់ខ្លួនអាចដាក់បណ្តឹងទៅកាន់ស្នាក់ការរបស់អាជ្ញាធរជាតិដោះស្រាយវិវាទក្រៅប្រព័ន្ធតុលាការ ឬស្ថាប័នមានសមត្ថកិច្ច ចាប់ពីថ្ងៃទី១ ខែមីនា ឆ្នាំ២០២៤ខាងមុខ ខណៈបន្ទាប់ពីការទទួលពាក្យបណ្តឹងចាប់ផ្តើមដំណើរការ ក្រុមការងារអាជ្ញាធរជាតិនឹងចុះដោះស្រាយដោយផ្ទាល់បន្ថែមទៀតនៅតាមមូលដ្ឋានជូនប្រជាពលរដ្ឋផងដែរ។
អ្នកនាំពាក្យរូបនេះបន្ថែមថា ពាក់ព័ន្ធនឹងវឌ្ឍនភាពបង្កើតអាជ្ញាធរជាតិដោះស្រាយវិវាទក្រៅប្រព័ន្ធតុលាការនេះ ក្រុមការងារកំពុងរៀបចំរចនាសម្ព័ន្ធស្ថាប័ន ដូចជាការរៀបចំអគ្គលេខាធិការដ្ឋាន មន្រ្តី បទដ្ឋានគតិយុត្ត និងឯកសារគាំទ្រដល់ប្រតិបត្តិការរបស់អាជ្ញាធរជាតិដោះស្រាយវិវាទក្រៅប្រព័ន្ធតុលាការ ដើម្បីឱ្យប្រតិបត្តិការទទួលបានប្រសិទ្ធភាព និងជោគជ័យ។
សូមជម្រាបថា អាជ្ញាធរជាតិដោះស្រាយវិវាទក្រៅប្រព័ន្ធតុលាការ ត្រូវបានរៀបចំឡើងក្នុងគោលបំណងបង្កើតឱ្យមានយន្តការថ្នាក់ជាតិមួយ ក្នុងការដោះស្រាយវិវាទក្រៅប្រព័ន្ធតុលាការ បន្ថែមលើយន្តការដែលមានស្រាប់ សំដៅលើកកម្ពស់គុណភាពប្រសិទ្ធភាព និងនិរន្តភាព នៃការដោះស្រាយវិវាទក្រៅប្រព័ន្ធតុលាការ ក្នុងគោលបំណងបង្ខិតសេវាដោះស្រាយវិវាទឱ្យកាន់តែខិតជិតប្រជាពលរដ្ឋនៅមូលដ្ឋាន, សម្រុះសម្រួលដោះស្រាយវិវាទមួយដែលអាចធានាបាននូវបរិយាកាសសន្តិភាពនិយម និងភាពសុខដុមរមនាក្នុងសង្គមជាតិ និងជួយកាត់បន្ថយការកកស្ទះសំណុំរឿងនៅតាមតុលាការ៕ អត្ថបទ៖ សេក ឧត្តម
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
