ទីប្រឹក្សាសន្តិសុខជាតិឈានមុខគេរបស់លោក ដូណាល់ ត្រាំ (Donald Trump) បានប្រាប់សារព័ត៌មានរ៉យទ័រ កាលពីថ្ងៃអង្គារ (១៣ កុម្ភៈ) ថាខ្លួននឹងជំរុញឱ្យមានការផ្លាស់ប្តូរចំពោះអង្គការណាតូ និងស្នើប្រព័ន្ធលំដាប់ថ្នាក់ថ្មី បើអតីតប្រធានាធិបតីរូបនេះវិលត្រឡប់ទៅកាន់អំណាចវិញ ដែលអាចបណ្តាលឱ្យប្រទេសសមាជិកមួយចំនួនបាត់បង់ការការពារប្រឆាំងនឹងការវាយប្រហារពីខាងក្រៅ។

លោក ខេត ខែលឡុក (Keith Kellogg) ឧត្តមសេនីយឯកចូលនិវត្តន៍ បាននិយាយនៅក្នុងបទសម្ភាសន៍មួយថា ប្រសិនបើសមាជិកនៃសម្ព័ន្ធយោធា ៣១ ប្រទេស មិនបានចំណាយយ៉ាងហោចណាស់ ២ ភាគរយនៃផលិតផលក្នុងស្រុកសរុបរបស់ខ្លួនលើវិស័យការពារជាតិ ដូចដែលបានព្រមព្រៀងគ្នានោះ លោកនឹងគាំទ្រការដកចេញនូវច្បាប់ការពារមាត្រាទី ៥ របស់ប្រទេសនោះនៅក្រោមសន្ធិសញ្ញាអាត្លង់ទិកខាងជើង។

មាត្រាទី ៥ ចែងថាការវាយប្រហារប្រឆាំងនឹងសមាជិកមួយនៃសម្ព័ន្ធយោធាដែលមានមូលដ្ឋាននៅអឺរ៉ុប នឹងត្រូវបានចាត់ទុកថាជាការវាយប្រហារប្រឆាំងនឹងសមាជិកទាំងអស់គ្នា ហើយសមាជិកនៃសម្ព័ន្ធយោធាត្រូវតែឆ្លើយតបដោយសមរម្យ។ បើមិនមានការការពារទាំងនោះទេ ប្រទេសជាសមាជិកនឹងមិនត្រូវបានធានាថាសមាជិកណាតូផ្សេងទៀតនឹងមកជួយខ្លួនទេ៕