ភ្នំពេញ ៖ នៅព្រឹកថ្ងៃទី១៤ ខែកុម្ភៈ ឆ្នាំ២០២៤ នៅសាល C អគារមិត្តភាព ទីស្តីការគណៈរដ្ឋមន្ត្រី ក្រុមប្រឹក្សាអ្នកច្បាប់ បានរៀបចំបើកវគ្គបណ្តុះបណ្តាលស្តីពី “ការរៀបចំគោល នយោបាយសេដ្ឋកិច្ចនិងពាណិជ្ជកម្មកម្ពុជា” ក្រោមអធិបតីភាព ឯកឧត្តម ឆែម គាតរិទ្ធី ទេសរដ្ឋមន្រ្តីទទួលបន្ទុកបេសកកម្មពិសេស តំណាងឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី។

វគ្គបណ្តុះបណ្តាលនេះត្រូវបានធ្វើបទបង្ហាញដោយឯកឧត្តមបណ្ឌិត សភាចារ្យ សុក ស៊ីផាន់ណា ទេសរដ្ឋមន្រ្តីទទួលបន្ទុកបេសកកម្មពិសេស ជូនដល់តំណាងក្រសួង ស្ថាប័ន ថ្នាក់ដឹកនាំនិងមន្ត្រីរាជការនៃអង្គភាពចំណុះទីស្តីការគណៈរដ្ឋមន្ត្រីទាំងអស់ ព្រមទាំងថ្នាក់ដឹកនាំ ទីប្រឹក្សា សមាជិក សមាជិកបម្រុង ជំនួយការ និងមន្ត្រីរាជការនៃ ក្រុម ប្រឹក្សាអ្នកច្បាប់និង ក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ មានចំនួនប្រមាណ២៥០នាក់។

ឯកឧត្តម ឆែម គាតរិទ្ធី បានស្នើដល់ថ្នាក់ដឹកនាំនិងមន្ត្រីដែលបានចូលរួមក្នុងវគ្គ បណ្តុះបណ្តាល សូមត្រង់ត្រាប់ស្តាប់ដោយយកចិត្តទុកដាក់ នូវបទឧទ្ទេសនាមរបស់វាគ្មិនកិត្តិយស និងត្រូវហ៊ាន សួរដេញដោលឱ្យបានផុលផុសបំផុតដើម្បីក្រេបយកចំណេះដឹងឪ្យច្រើន ឬចូលរួមផ្តល់ជាយោបល់ ចែករំលែក់បទពិសោធន៍ល្អៗ និងលើកយកបញ្ហា ប្រឈមក្នុងការងារកន្លងមកដែលខ្លួនជួបប្រទះដើម្បីពិភាក្សារក ដំណោះស្រាយ។

ឆ្លៀតក្នុងឱកាសនេះ ឯកឧត្តមក៏បានកោតសរសើរចំពោះចក្ខុវិស័យគោលនយោបាយ និងស្នាដៃដឹកនាំរបស់ឯកឧត្តមឧបនាយករដ្ឋមន្ត្រី ប្រចាំការ វង្សី វិស្សត ក្នុងការដឹកនាំទីស្ដីការគណៈរដ្ឋមន្ត្រីនាពេល កន្លងមក។

ឯកឧត្តម បានវាយតម្លៃខ្ពស់ចំពោះវត្តមានរបស់ ឯកឧត្តម លោកជំទាវ លោក លោកស្រី នាងកញ្ញា ទាំងអស់ក្នុងវគ្គបណ្តុះបណ្តាល នាថ្ងៃនេះ ជាពិសេសបានផ្តាំផ្ញើនូវអភិក្រមរបស់ សម្ដេចអគ្គមហាសេនាបតីតេជោ ហ៊ុន សែន ដែលយើងត្រូវគោរពនិងអនុវត្តទាំងអស់គ្នាគឺ ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់ ព្រមទាំងឈរលើ

គោលការណ៍និងស្មារតីបំពេញការងារប្រកបដោយវិជ្ជាជីវៈ គោរពច្បាប់ លិខិតបទដ្ឋាន និងគោរពក្រមសីលធម៌វិជ្ជាជីវៈ បំពេញការងារជាក្រុម ដោយឈរលើស្មារតីនៃប្រយោជន៍រួម និង គុណតម្លៃរួម ចេះសហការគ្នា ចេះសម្របសម្រួលគញនា ចេះជួយគ្នា និង ចេះចែករំលែក ដោយគោរពឋានានុក្រម “និងការទទួលខុសត្រូវតាម មុខងារ និងភារកិច្ចរៀងៗខ្លួន។

ត្រូវបំពេញការងារដោយប្រកាន់ខ្ជាប់ស្មារតីបុរេសកម្ម ច្នៃប្រឌិត និង ឈរលើគោលការណ៍ដោះស្រាយបញ្ហា តែមិនបង្កើតបញ្ហាហើយទទួលយកការរិះគន់ដោយស្ថាបនា ចេះស្ដាប់ទស្សនៈ ឬមតិផ្សេង ពីខ្លួន និងត្រូវចេះធ្វើស្វ័យទិតៀន។

គួរបញ្ជាក់ថា នេះជាវគ្គបណ្តុះបណ្តាលទី១ នៅក្នុងអាណត្តិថ្មី ដែលក្រុមប្រឹក្សាអ្នកច្បាប់នៃទីស្តីការគណៈរដ្ឋមន្រ្តីរៀបចំឡើង ក្រោមគំនិតផ្តួចផ្តើមរបស់ឯកឧត្តម វង្សី វិស្សុត ឧបនាយករដ្ឋមន្រ្តីប្រចាំការ រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី ដើម្បីពង្រឹងសមត្ថភាពនិងចំណេះដឹងឱ្យកាន់តែទូលំទូលាយ សំដៅបង្កើនផលិតភាពការងារឱ្យកាន់តែប្រសើរជាងមុនទាំងក្នុងក្របខ័ណ្ឌទីស្តីការ គណៈរដ្ឋមន្ត្រី ក៏ដូចតាមបណ្តាក្រសួងស្ថាប័នផ្សេងៗ៕ ដោយ ៖ សុត