យោងតាមសេចក្តីថ្លែងការបានឲ្យដឹងថា មូលនិធិកុមារអង្គការសហប្រជាជាតិ (UNICEF) បានប្រកាសអាសន្នពីការបំផ្ទុះគ្រាប់បែក នៅក្នុងជំរំមួយ សម្រាប់ប្រជាជនភៀសខ្លួន នៅសាធារណៈរដ្ឋប្រជាធិបតេយ្យកុងហ្គោ ភាគខាងកើត (DRC)។

អ្នកតំណាង អង្គការ យូនីសេហ្វ(UNICEF) នៅសាធារណៈរដ្ឋប្រជាធិបតេយ្យកុងហ្គោ បាននិយាយថា វា គិតមិនដល់នោះទេថា ក្រុមគ្រួសារជាច្រើន ដែលភៀសខ្លួនចេញពីអំពើហិង្សា ត្រូវបានសម្លាប់និងរងរបួស នៅក្នុងទីកន្លែងមួយ ដែលត្រូវបានគេសន្និដ្ឋានថា បានផ្តល់ទីសុវត្ថិភាពដល់ពួកគេ។ 

អ្នកតំណាងរូបនេះ និយាយថាយើងអំពាវនាវដល់គ្រប់ភាគីទាំងអស់ក្នុងជម្លោះ ការពារអាយុជីវិត ប្រជាជនស្លូតត្រង់ ជាពិសេសកុមារ។ យើងសុំដោយទទូចដល់រដ្ឋាភិបាល នាំយកអ្នកប្រព្រឹត្តមកទទួលខុសត្រូវ និងពង្រឹងការការពារ សម្រាប់កុមារ និងក្រុមគ្រួសាររបស់ពួកគេ។ 

ការបំផ្ទុះគ្រាប់បែក បានកើតឡើង កាលពីល្ងាចថ្ងៃចន្ទនៅក្នុងជំរំ ហ្សៃណា សម្រាប់ប្រជាជនភៀសខ្លួន នៅជាយក្រុង Sake ក្នុងខេត្តគីវូ ខាងជើង បណ្តាលឲ្យមានអ្នកស្លាប់ និងរងរបួសជាច្រើននាក់។ 

ការប្រយុទ្ធគ្នា នៅប្រទេសកុងហ្គោភាគខាងកើត បានកើនឡើងខ្លាំងក្នុងប៉ុន្មានខែថ្មីៗនេះ បណ្តាលឲ្យមានការជម្លៀសប្រជាជនទ្រង់ទ្រាយធំ និងកើនឡើងតម្រូវការមនុស្សធម៌។

យោងតាមសេចក្តីថ្លែងការណ៍ បានឲ្យដឹងថា នាពេលបច្ចុប្បន្ន មានប្រជាជនភៀសខ្លួន១,១ លាននាក់ នៅក្នុងខេត្តគីវូនេះ។