រដ្ឋាភិបាលរបស់ប្រទេសអាហ្រ្វិកខាងត្បូង បាននិយាយកាលពីថ្ងៃអង្គារថា ខ្លួនបានដាក់សំណើជាបន្ទាន់មួយជាមួយតុលាការយុត្តិធម៌អន្តរជាតិរបស់អង្គការសហប្រជាជាតិ ដើម្បីពិចារណាថាតើប្រតិបត្តិការយោធារបស់អ៊ីស្រាអែលដែលផ្តោតលើទីក្រុងរ៉ាហ្វាភាគខាងត្បូងនៃតំបន់ហ្កាហ្សា គឺជាការរំលោភលើសេចក្តីសម្រេចបណ្តោះអាសន្ន ដែលតុលាការ បានប្រកាសកាលពីខែមុន នៅក្នុងសំណុំរឿងមួយដែលចោទប្រកាន់ពីបទប្រល័យពូជសាសន៍។

អាហ្រ្វិកខាងត្បូង បាននិយាយថា ខ្លួនបានស្នើឲ្យតុលាការថ្លឹងថ្លែងថាតើការវាយប្រហាររបស់អ៊ីស្រាអែលលើទីក្រុងរ៉ាហ្វា និងចេតនារបស់ខ្លួនក្នុងការបើកការវាយលុកលើទីក្រុងដែលមានប្រជាជនប៉ាឡេស្ទីនចំនួន ១,៤លាននាក់ បានស្វែងរកទីជម្រក បំពានទាំងអនុសញ្ញាប្រល័យពូជសាសន៍របស់អង្គការសហប្រជាជាតិ និងបទបញ្ជាបឋមដែលតុលាការ បានប្រកាសកាលពីខែមុន ក្នុងសំណុំរឿងចោទប្រកាន់អ៊ីស្រាអែលពីបទប្រល័យពូជសាសន៍។

ទីក្រុងរ៉ាហ្វា ស្ថិតនៅជាប់ព្រំដែនជាមួយប្រទេសអេហ្ស៊ីប ដែលបានព្រមានថា ការវាយលុកលើទីក្រុងដែលកាន់កាប់ជាងពាក់កណ្តាលនៃប្រជាជនហ្កាហ្សា នឹងនាំមកនូវគ្រោះមហន្តរាយ។

រដ្ឋាភិបាលអាហ្រ្វិកខាងត្បូង បាននិយាយនៅក្នុងសេចក្តីថ្លែងការណ៍មួយថា ទីក្រុងរ៉ាហ្វា គឺជា«ជម្រកចុងក្រោយសម្រាប់ការរស់រានមានជីវិតរបស់ប្រជាជននៅតំបន់ហ្កាហ្សា។ រដ្ឋាភិបាលនេះ បានស្នើសុំឲ្យតុលាការកំពូលរបស់អង្គការសហប្រជាជាតិពិចារណាលើការប្រើប្រាស់អំណាចរបស់ខ្លួន ដើម្បីចេញបញ្ជាបឋមបន្ថែម ដែលប្រាប់អ៊ីស្រាអែលឲ្យបញ្ឈប់ការស្លាប់ និងការបំផ្លិចបំផ្លាញ នៅទីនោះ។