ព្យុះរដូវរងាបោកបក់លឿនដ៏ខ្លាំងក្លា បានគ្របដណ្តប់តំបន់ភាគឦសានសហរដ្ឋអាមេរិក កាលពីថ្ងៃអង្គារ ដោយនាំមកជាមួយព្រិលធ្លាក់ខ្លាំង និងធ្វើឲ្យមានស្ថានភាពបើកបរប្រកបដោយគ្រោះថ្នាក់ សម្រាប់ពលរដ្ឋអាមេរិករាប់លាននាក់ ខណៈដែលសាលារៀនបង្ខំបិទទ្វារ ហើយនិងបង្កភភាពវឹកវរដល់ការធ្វើដំណើរតាមផ្លូវអាកាសផងដែរ ។ 

 សេវាកម្មឧតុនិយមជាតិ រាយការណ៍ថា ពលរដ្ឋជាង ៣០លាននាក់ ចាប់ពីតំបន់ភាគឦសានរដ្ឋ West Virginia រហូតដល់តំបន់ New England ស្ថិតក្រោមការប្រកាសអាសន្នពីព្យុះរដូវរងា ស្របពេលដែលប្រព័ន្ធសំពាធទាប Nor'easter កើតមានតាមតំបន់ជាច្រើន ធ្វើឲ្យមានព្រិលធ្លាក់ខ្លាំងកម្រាស់ ១៥សង់ទីម៉ែត្រ កាលពីយប់កន្លងទៅ ។ 

 នៅទីក្រុង New York ដែលជាទីក្រុងមានពលរដ្ឋរស់នៅច្រើនជាងគេបំផុតរបស់សហរដ្ឋអាមេរិក ភ្លៀងប្រែជាព្រិលធ្លាក់នៅវេលាពេលព្រឹក ។ ទីក្រុងមួយនេះ ត្រូវបានគេរំពឹងថា នឹងមានព្រិលធ្លាក់កម្រាស់ជិត ១៨សង់ទីម៉ែត្រ ពេញមួយថ្ងៃ ធ្វើឲ្យស្ថានភាពបើកបរប្រកបដោយគ្រោះថ្នាក់ខ្លាំង ។ 

 ទីភ្នាក់ងារគ្រប់គ្រងគ្រាអាសន្នទីក្រុង New York និយាយនៅលើបណ្តាញព័ត៌មានសង្គម Xអតីតបណ្តាញព័ត៌មានសង្គម Twitterថា ព្រិលបានធ្លាក់ក្នុងអត្រា ៥សង់ទីម៉ែត្រក្នុង១ម៉ោងនៅទូទាំងតំបន់ជ្រលងភ្នំ Lower Hudson ស្ថិតនៅភាគខាងជើងទីក្រុង New York ។ 

 ផ្នែកផ្សេងទៀតក្នុងតំបន់ អាចមានព្រិលធ្លាក់រហូតដល់ជាង ៣០សង់ទីម៉ែត្រ មុនពេលព្យុះបោកបក់ឆ្ពោះទៅទិសខាងកើត និងបោកបក់ឆ្លងផុតតំបន់នៅពេលក្រោយក្នុងថ្ងៃនេះ ។ ទីក្រុង Houston អាចនឹងមានព្រិលធ្លាក់កម្រាស់ជិត ២៣សង់ទីម៉ែត្រ ជាហេតុនាំឲ្យអភិបាលក្រុងមួយនេះ ប្រកាសដាក់រដ្ឋក្នុងគ្រាអាសន្ន ៕