ប្រមុខ CIA និងចារកម្មអ៊ីស្រាអែល បានជួបនាយករដ្ឋមន្ត្រីកាតា ក្នុងប្រទេសអេហ្ស៊ីប ដើម្បីពិភាក្សាអំពីកិច្ចចរចាបទឈប់បាញ់ នៅតំបន់ហ្កាហ្សា។

លោក វីល្លៀម ប៊ឺន (William Burns) នាយក CIA និង លោក ដេវីត បានៀ (David Barnea) ប្រធានទីភ្នាក់ងារចរកម្មMossad របស់អ៊ីស្រាអែល បានជួបជាមួយ លោក Sheikh Mohammed Bin Abdulrahman al-Thani នាយករដ្ឋមន្ត្រីកាតា និងក្រុមមន្ត្រីអេហ្ស៊ីប។

ទីភ្នាក់ងារចារកម្មអ៊ីស្រាអែល បាននិយាយថា ខ្លួនកំពុងវាយតម្លៃការឆ្លើយតបរបស់ពួកហាម៉ាសចំពោះកិច្ចព្រមព្រៀងដែលបានស្នើឡើង ដើម្បីបញ្ឈប់ការប្រយុទ្ធគ្នានៅតំបន់ហ្កាហ្សាស្ទ្រីប។

សារព័ត៌មាន Al-Qahera ដែលមានទំនាក់ទំនងទៅនឹងការស៊ើបអង្កេតរបស់អេហ្ស៊ីប បានរាយការណ៍អំពី «កិច្ចប្រជុំ៤ភាគី»។

មន្ត្រីហាម៉ាសម្នាក់ បានប្រាប់សារព័ត៌មាន AFP ក្នុងលក្ខខណ្ឌមិនបញ្ចេញឈ្មោះថា៖«ក្រុមហាម៉ាស និងក្រុមសកម្មប្រយុទ្ធផ្សេងទៀត កំពុងរង់ចាំលទ្ធផលនៃកិច្ចប្រជុំនៅទីក្រុងគែរ ហើយក្រុមហាម៉ាសបើកចំហដើម្បីពិភាក្សាអំពីគំនិតផ្តួចផ្តើមណាមួយដែលសម្រេចបាននូវការបញ្ចប់ការឈ្លានពាននិងសង្គ្រាមដើម្បីនិយាយទៅកាន់ប្រព័ន្ធផ្សព្វផ្សាយ។

កាលពីថ្ងៃចន្ទ លោកប្រធានាធិបតី ចូ បៃដិន (Joe Biden) បានប្រកាសថា «ធាតុសំខាន់ៗនៃកិច្ចព្រមព្រៀង គឺនៅលើតុ» ប៉ុន្តែបានសារភាពថា មាន «ភាពចន្លោះប្រហោងដែលនៅមាន»។