យោធាទីក្រុងគីវ និយាយថា នៅថ្ងៃពុធនេះ កងកម្លាំងអ៊ុយក្រែន បានបំផ្លាញនាវាចម្បាំងឡើងគោកដ៏ធំមួយគ្រឿង Tsezar Kunikov របស់កងទ័ពជើងទឹករុស្ស៊ីនៅជិតឧបទ្វីបកាន់កាប់គ្រីមៀ ស្ថិតក្នុងសមុទ្រខ្មៅ ។ 

 សារព័ត៌មានអ៊ុយក្រែន បានចុះផ្សាយវីដេអូជាច្រើនឃ្លីបឃើញសំណុំផ្សែងហោះពីលើសមុទ្រជិតតំបន់ឆ្នេរភាគខាងត្បូងឧបទ្វីបគ្រីមៀ ក៏ដូចជាឧទ្ធម្ភាគចក្រជាច្រើនគ្រឿង ហោះសំកាំងពីលើសមុទ្រ ។ 

 យោធាបាននិយាយលើបណ្តាញព័ត៌មានសង្គម Telegram ថា កងកម្លាំងប្រដាប់អាវុធអ៊ុយក្រែន រួមជាមួយអង្គភាពចារកម្មក្រសួងការពារជាតិ បានបំផ្លាញនាវាចម្បាំងឡើងគោកដ៏ធំមួយគ្រឿង Tsezar Kunikov ។ វាស្ថិតនៅក្នុងដែនទឹកអ៊ុយក្រែន ជិតទីក្រុង Alupka ពេលរងការវាយប្រហារ ។ 

 ពុំទាន់មានសេចក្តីអត្ថាធិប្បាយភ្លាមៗនោះទេពីរុស្ស៊ី ដែលនិយាយនៅមុននេះថា ពួកគេបានបំផ្លាញយានដ្រូន ៦គ្រឿងនៅក្នុងសមុទ្រខ្មៅ ។ 

 ទីភ្នាក់ងារចារកម្មយោធាអ៊ុយក្រែន និយាយថា នាវាចម្បាំងរុស្ស៊ី ត្រូវបានវាយប្រហារដោយយានដ្រូនកងទ័ពជើងទឹក ។ 

 គួរឲ្យដឹងថា អ៊ុយក្រែន បានប្រើប្រាស់យានដ្រូនគ្មានមនុស្សបើករបស់កងទ័ពជើងទឹក ផ្ទុកដោយគ្រឿងផ្ទុះ វាយប្រហារលើនាវាចម្បាំងរុស្ស៊ី ដើម្បីព្យាយាមរុញច្រានពួកគេចេញពីតំបន់ភាគខាងលិចសមុទ្រខ្មៅ ក៏ដូចជាចង់បើកច្រករបៀងដឹកជញ្ជូននៅតាមផ្លូវនាំចេញសំខាន់ៗរបស់ខ្លួន ។ 

 ជាក់ស្តែងកាលពីខែធ្នូ ឆ្នាំកន្លងទៅ មីស៊ីលតម្រង់គោលដៅអ៊ុយក្រែន បានវាយប្រហារនាវាចម្បាំងឡើងគោកដ៏ធំមួយគ្រឿងទៀតរបស់រុស្ស៊ី នៅឧបទ្វីបគ្រីមៀ ៕