ឯកឧត្តមសាស្រ្តាចារ្យ កុយ វ៉ាន់នី រដ្ឋលេខាធិការក្រសួងសុខាភិបាល តំណាង​ឯកឧត្តម​សាស្រ្តា​ចារ្យ ឈាង រ៉ា រដ្ឋមន្រី្តក្រសួងសុខាភិបាល សូមអោយការបំរើសេវាសុខាភិបាលគ្រប់កម្រិត និង​គ្រប់​ជំនាញ​ឯកទេសរបស់មនី្ទរពេទ្យមិត្តភាពខ្មែរ សូវៀត ត្រូវតែមានភាពទន់ភ្លន់ ឆ្លើយ​តប​បាន​ទាន់​ពេលវេលា និងដោយប្រកាន់ខ្ជាប់ជានិច្ចនូវ «ក្រមសីលធម៌វិជ្ជាជីវៈវេជ្ជសាស្ត្រ - Medical Ethics»​។

ការថ្លែងរបស់ឯកឧត្តមសាស្រ្តាចារ្យ កុយ វ៉ាន់នី យ៉ាងដូច្នេះក្នុងទិវាវេជ្ជសាស្រ្ត-សល្យសាស្រ្ត លើក​ទី២៦ និងថែទាំវេជ្ជសាស្រ្តលើកទី១៣ រយៈពេល២ថ្ងៃ ចាប់ពីថ្ងៃទី១៥-១៦ ខែកុម្ភះ ឆ្នាំ២០២៤ ក្រោម​ប្រធានបទ«ពិនិត្យព្យាបាលគ្រប់ជ្រុងជ្រោយ និងនវានុវត្តន៍» នៅមន្ទីរពេទ្យមិត្តភាពខ្មែរ-សូវៀត​។

ឯកឧត្តម​សាស្រ្តាចារ្យ បន្តថា នេះជាកាតព្វកិច្ចចាំបាច់របស់យើង ជាអ្នកពិនិត្យ ព្យាបាល និងថែ​ទាំ​ជំងឺ ព្រមទាំងពង្រឹងការអនុវត្តក្រមសីលធម៌ វិជ្ជាជីវៈរបស់ខ្លួនឲ្យកាន់តែប្រសើរឡើង ក្នុង​គោល​ដៅ​កាត់​បន្ថយអត្រាពិការភាព និងអត្រាមរណៈភាពរបស់អ្នកជំងឺ ជាពិសេស​ផល​ប៉ះ​ពាល់​ពីជំងឺ​ឆ្លង​កាច​សាហាវ ជំងឺមិឆ្លងរ៉ាំរ៉ៃ រួមទាំងមហារីក លើសឈាម ទឹកនោមផ្អែម បេះដូង ជំងឺ​តម្រង​នោម ជំងឺសួត ជំងឺភ្នែក និងជំងឺផ្សេងៗទៀត។

ជាមួយគ្នានេះតាងនាមឲ្យក្រសួងសុខាភិបាល ឯកឧត្តមសាស្រ្តាចារ្យ កុយ វ៉ាន់នី បានផ្តាំផ្ញើមតិ​ឯកឧត្តម​សាស្ត្រា​ចារ្យរដ្ឋមន្ត្រី ឈាង រ៉ា រដ្ឋមន្រី្តក្រសួងសុខាភិបាល ដូចជាខាងក្រោម៖ ក្នុង​ដំណាក់​កាល​បច្ចុប្បន្នដែលកំណើនការមកទទួលសេវានៅអង្គភាពសុខាភិបាលសាធារណៈ ទូទាំង​ប្រទេសកាន់តែមានសន្ទុះច្រើនគំហុក ពីមួយថ្ងៃទៅមួយថ្ងៃ ដូចនេះ​សូម​អោយ​ការ​បំរើ​សេវា​សុខាភិបាលគ្រប់កម្រិត និងគ្រប់ជំនាញឯកទេស ត្រូវតែមានភាពទន់ភ្លន់ ឆ្លើយតប​បាន​ទាន់​ពេលវេលា និងស្ថានការណ៍តម្រូវ ដោយឈរលើមូលដ្ឋាន តម្កល់ខ្ពស់ និងដោយ​ប្រកាន់​ខ្ជាប់​ជា​និច្ច​នូវ «ក្រមសីលធម៌វិជ្ជាជីវៈវេជ្ជសាស្ត្រ»។

ជាចុង​ក្រោយឯកឧត្តមសាស្រ្តាចារ្យ ងី ម៉េង នាយកមនី្ទរពេទ្យមិត្តភាពខ្មែរ-សូវៀត បានលើក​ឡើង​ថា ចំណុចពិសេសនៃការរៀបចំទិវានេះ មន្ទីរពេទ្យបានប្រមូលផ្តុំប្រធានបទដ៏ល្អៗពីវាគ្មិនថ្នាក់ជាតិ អន្តរជាតិ ដោយគ្របដណ្តប់លើគ្រប់ជំនាញទាំងអស់ ដែលមាន​ប្រធាន​បទ​ទាំង​អស់​សរុប​ចំនួន​ជាង​​ ៣៨ប្រធានបទ ក្នុងនោះផ្នែកវេជ្ជសាស្ត្រ និងសល្យសាស្ត្រមានចំនួន២៣ប្រធានបទ និង​ថែ​ទាំ​មាន​ចំនួន១៥ប្រធានបទ ព្រមទាំងមាន Poster ចំនួន០៧ ដែលផ្តោត​សំខាន់​ទៅ​លើ​ការ​លើក​កម្ពស់​ការ​ព្យាបាលគ្រប់ជ្រុងជ្រោយ និងនវានុវត្តន៍។

ឯកឧត្តមសាស្រ្តាចារ្យ ងី ម៉េង បានបញ្ជាក់ថា ក្នុងឆ្នាំ២០២៣កន្លងមកនេះ មាន​អ្នក​ជំងឺ​ដែល​មក​ពិគ្រោះ​ជំងឺ​ក្រៅ នៅមន្ទីរពេទ្យមិត្តភាពខ្មែរ-សូវៀត មានចំនួន៤៧៤,២០៥ករណី និង​សម្រាក​ព្យាបា​ល​មានចំនួន ៦១,៦៣៦នាក់ សរុបទាំងអស់ចំនួន ៥៣៥,៨៤១ នាក់៕ អត្ថបទ រដ្ឋា