ភ្នំពេញ៖ សម្តេចរដ្ឋសភាធិការធិបតី ឃួន សុដារី ប្រធានរដ្ឋសភាជាតិ នៅថ្ងៃទី១៥ ខែកុម្ភៈ ឆ្នាំ២០២៤នេះ បានបើកប្រជុំគណៈកម្មាធិការអចិន្រ្តៃយ៍រដ្ឋសភា ដើម្បីពិនិត្យមើលរបៀបវារៈចំនួន៧ ក្នុងការកោះប្រជុំរដ្ឋសភារដ្ឋសភាជាវិសាមញ្ញ នីតិកាលទី៧ ។

 ឯកឧត្តម ឡេង ប៉េងឡុង អ្នកនាំពាក្យរដ្ឋសភាជាតិ មានប្រសាសន៍ថា លទ្ធផលនៃកិច្ចប្រជុំគណៈកម្មាធិការអចិន្ត្រៃយ៍រដ្ឋសភា អង្គប្រជុំបានអនុម័តយល់ព្រម លើសំណើសុំកោះប្រជុំរដ្ឋសភាជាវិសាមញ្ញ នីតិកាលទី៧ ដើម្បីបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ចំនួន២រូប ដោយរដ្ឋសភា និងបានអនុម័តយល់ព្រមលើរបាយការណ៍ស្តីពី លទ្ធផលនៃការទទួលពាក្យសុំឈរឈ្មោះជាបេក្ខជនសមាជិកព្រឹទ្ធសភា នីតិកាលទី៥ ចំនួន២រូប ជ្រើសតាំងដោយរដ្ឋសភាសរុបចំនួន ៥រូប ។

ឯកឧត្តមបានបន្តថា អង្គប្រជុំក៏បានអនុម័តយល់ព្រម ដើម្បីពិនិត្យ និងអនុម័តសេចក្តីព្រាងច្បាប់ស្តីពី ការដឹកជញ្ជូនតាមផ្លូវទឹក និងសេចក្តីព្រាងច្បាប់ស្តីពី ការអនុម័តយល់ព្រមលើពិធីសារ សម្រាប់ធ្វើវិសោធនកម្មកិច្ចព្រមព្រៀងម៉ារ៉ាកេស ស្តីពីការបង្កើតអង្គការពាណិជ្ជកម្មពិភពលោក ដើម្បីបញ្ចូលកិច្ចព្រមព្រៀងស្តីពី ការឧបត្ថម្ភធនជលផល ជូនគណៈកម្មការជំនាញ ផងដែរ ហើយធ្វើរបាយការណ៍ជូនគណៈកម្មាធិការអចិន្រ្តៃយ៍រដ្ឋសភាវិញ ។ អង្គប្រជុំបានអនុម័តកាលបរិច្ឆេទ បើកសម័យប្រជុំរដ្ឋសភាជាវិសាមញ្ញ នីតិកាលទី៧ ត្រូវនឹងថ្ងៃទី១ ខែមីនា ឆ្នាំ២០២៤ ដោយមានរបៀបវារៈការបោះឆ្នោតជ្រើសតាំង សមាជិកព្រឹទ្ធសភា នីតិកាលទី៥ ចំនួន២រូប ដោយរដ្ឋសភា នីតិកាលទី៧ ។

អ្នកនាំពាក្យរដ្ឋសភា បានបញ្ជាក់ថា អង្គប្រជុំក៏បានពិភាក្សា និងអនុម័តរបៀបវារៈបន្ថែម ដែលមានលទ្ធផល ដូចជាអង្គប្រជុំអនុម័ត សេចក្តីស្នើសុំកោះប្រជុំរដ្ឋសភាជាវិសាមញ្ញ នីតិកាលទី៧ ដើម្បីបោះឆ្នោតផ្តល់សេចក្តីទុកចិត្ត លើការតែងតាំងបំពេញបន្ថែម សមាសភាពរាជរដ្ឋាភិបាល ដោយអង្គប្រជុំអនុម័តសេចក្តីស្នើសុំរដ្ឋសភា បោះឆ្នោតផ្តល់សេចក្តីទុកចិត្តលើការតែងតាំងបំពេញបន្ថែមសមាសភាពរាជរដ្ឋាភិបាល ចំនួន៣រូប ដើម្បីដាក់ជូនសម័យប្រជុំរដ្ឋសភាជាវិសាមញ្ញ ក្នុងនោះមានផ្ដល់សមាសភាពដល់ឯកឧត្តម ហ៊ុន ម៉ានី ជាឧបនាយករដ្ឋមន្ត្រី និងជារដ្ឋមន្ត្រីក្រសួងមុខងារសាធារណៈ ឯកឧត្តម ស្រ៊ី ថាមរុង្គ និងឯកឧត្តម ប៉ែន វិបុល ជាទេសរដ្ឋមន្ត្រីទទួលបន្ទូកបេសកកម្មពិសេស ។ អង្គប្រជុំបានអនុម័តកាលបរិច្ឆេទបើកសម័យប្រជុំរដ្ឋសភាជាវិសាមញ្ញ នីតិកាលទី៧ នៅថ្ងៃទី២១ ខែកុម្ភៈ ឆ្នាំ២០២៤ខាងមុខ ៕

អត្ថបទ ៖ បាន សុខរិទ្ធិ