ភ្នំពេញ៖ នៅថ្ងៃទី៧ ខែកុម្ភៈ ឆ្នាំ២០២៤ ឯកឧត្តមបណ្ឌិត រដ្ឋលេខាធិការ ចែម វីឌ្យ៉ា រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ និង ឯកឧត្តម ឯកអគ្គរាជទូត ហ្វ្រង់ស័រ ដឺឡាយ៉េ (François DELHAYE) នាយកទទួលបន្ទុកអាស៊ី និងអូសេអានី បានជួបពិភាក្សាគ្នាក្នុងកិច្ចប្រជុំពិគ្រោះយោបល់ទ្វេភាគីលើកទី១ នៅទីស្ដីការក្រសួង។

ជាកិច្ចចាប់ផ្តើម ឯកឧត្តមបណ្ឌិត ចែម វីឌ្យ៉ា បានថ្លែងអំណរគុណយ៉ាងជ្រាលជ្រៅចំពោះបែលហ្ស៊ិក ក្នុងការផ្តល់ជំនួយដ៏ថ្លៃថ្លាដល់កម្ពុជាក្នុងរយៈពេលជាច្រើនឆ្នាំកន្លងមកនេះ ដែលបានចូលរួមចំណែកយ៉ាងសំខាន់ក្នុងការអភិវឌ្ឍន៍សេដ្ឋកិច្ចសង្គមរបស់កម្ពុជា ជាពិសេសជំនួយលើវិស័យកសិកម្ម សុខាភិបាល ការអប់រំ ការការពារបរិស្ថាន ការការពារសង្គម អង្គជំនុំជម្រះវិសាមញ្ញក្នុង តុលាការកម្ពុជា(អ.វ.ត.ក) និងសកម្មភាពដោះមីន។ 

ឯកឧត្តម ចែម វីឌ្យ៉ា បានលើកឡើងពីសារៈសំខាន់នៃទំនាក់ទំនងនយោបាយទ្វេភាគីរវាងប្រទេសទាំងពីរ តាមរយៈការចូលរួមរបស់ថ្នាក់ដឹកនាំកម្ពុជា ក្នុងកិច្ចប្រជុំកម្រិតខ្ពស់នៅប្រទេសបែលហ្ស៊ិក ក៏ដូចជាទំនាក់ទំនងរបស់រដ្ឋមន្ត្រីការបរទេសទាំងពីរ នៅក្នុងឱកាសនៃការចូលរួមវេទិកាអន្តរជាតិផ្សេងៗ។ ឯកឧត្តមបណ្ឌិត ក៏បានជម្រាបជូនអំពីស្ថានភាពនយោបាយថ្មីៗ និងការអភិវឌ្ឍន៍សេដ្ឋកិច្ចនៅកម្ពុជា ក៏ដូចជាកម្មវិធីគោលនយោបាយ អាទិភាពទាំងប្រាំមួយ និងយុទ្ធសាស្ត្របញ្ចកោណដំណាក់កាលទីមួយរបស់រាជរដ្ឋាភិបាលថ្មីកម្ពុជា។

ជាកិច្ចឆ្លើយតប ឯកឧត្តម ឯកអគ្គរាជទូត បានបញ្ជាក់ជាថ្មីម្តងទៀតនូវការប្តេជ្ញា ចិត្តយ៉ាងមុតមាំរបស់បែលហ្ស៊ិក ក្នុងការបន្តពង្រឹងកិច្ចសហប្រតិបត្តិការទាំងក្នុងកម្រិតទ្វេភាគី និងពហុភាគីជាមួយកម្ពុជា។ ឯកឧត្តម ឯកអគ្គរាជទូត ក៏បានជម្រាបជូនអំពីស្ថានភាពនយោបាយរបស់បែលហ្ស៊ិក នៅពេលដែលបែលហ្ស៊ិកកំពុងរៀបចំការបោះឆ្នោតសហព័ន្ធនៅក្នុងខែមិថុនាខាងមុខនេះ និងអំពីចំណុចអាទិភាពទាំងប្រាំមួយរបស់បែលហ្ស៊ិក ក្នុងអាណត្តិដែលប្រទេសបែលហ្សិកជាប្រធានប្តូរវេននៃក្រុមប្រឹក្សាសហភាពអឺរ៉ុប សម្រាប់ឆមាសទីមួយនៃឆ្នាំ២០២៤។

ក្នុងឱកាសនោះ ភាគីទាំងពីរបានបង្ហាញការប្តេជ្ញាចិត្ត ក្នុងការពង្រឹងនិងពង្រីកបន្ថែមទៀតនូវវិស័យសក្តានុពល សម្រាប់កិច្ចសហប្រតិបត្តិការនាពេលអនាគតក្នុងវិស័យពាណិជ្ជកម្ម និងការវិនិយោគ តាមរយៈការបង្កើតមូលដ្ឋានច្បាប់។ 

ក្រៅពីនោះ ភាគីទាំងពីរ ក៏បានពិភាក្សាអំពីលទ្ធភាពនៃកិច្ចសហប្រតិបត្តិការក្នុងការអភិវឌ្ឍធនធាន មនុស្សផងដែរ។ ភាគីទាំងពីរ បានចែករំលែកទស្សនៈស្តីពីសារៈសំខាន់នៃការបន្តគាំទ្រគ្នាទៅវិញទៅមក ក្នុងវេទិកាអន្តរជាតិ ព្រមទាំងផ្លាស់ប្តូរទស្សនៈលើបញ្ហាតំបន់ និងសកលលោកមួយចំនួនដែលជាកង្វល់រួម។

ជាចុងក្រោយ ឯកឧត្តមបណ្ឌិត ចែម រីឌ្យ៉ា សង្ឃឹមយ៉ាងមុតមាំចំពោះភាគីបែលហ្ស៊ិក ក្នុងការចូលរួមកិច្ចប្រជុំកំពូលស្តីពីពិភពលោកគ្មានមីនក្រោមអនុសញ្ញាអូតាវ៉ា ដែលនឹងប្រព្រឹត្តទៅនៅថ្ងៃទី២៥ ខែវិច្ឆិកា ឆ្នាំ២០២៤ នៅខេត្តសៀមរាបខាងមុខនេះ និងស្វែងរកការគាំទ្រពីភាគីបែលហ្ស៊ិក សម្រាប់ បេក្ខភាពកម្ពុជាធ្វើជាម្ចាស់ផ្ទះនៃកិច្ចប្រជុំកំពូលលើកទី២០ នៃអង្គការអន្តរជាតិហ្វ្រង់កូហ្វូនី នៅឆ្នាំ ២០២៦។ 

បន្ថែមលើនេះ ភាគីទាំងពីរ បានឯកភាពថាយន្តការពិគ្រោះយោបល់ទ្វេភាគីមានសារៈសំខាន់ ក្នុងការជំរុញកិច្ចសហប្រតិបត្តិការរវាងប្រទេសទាំងពីរថែមទាំងត្រៀមខ្លួនរួចជាស្រេចក្នុងការរៀបចំកិច្ចប្រជុំពិគ្រោះយោបល់ទ្វេភាគីលើកទី២ ដែលនឹងប្រព្រឹត្តទៅនៅទីក្រុងព្រុចសែលតាមពេលវេលាសមស្រប៕ ដោយ ៖ ឧត្ដម