សារព័ត៌មានរ៉យទ័របានរាយការណ៍ថា ខណៈកិច្ចខិតខំប្រឹងប្រែងការទូតដើម្បីបញ្ឈប់ការប្រយុទ្ធគ្នានៅតំបន់ហ្កាហ្សា និងការដោះលែងចំណាប់ថ្នូរអ៊ីស្រាអែល ហាក់ដូចជាបរាជ័យកាលពីថ្ងៃពុធ (១៤ កុម្ភៈ) ការិយាល័យលោកនាយករដ្ឋមន្ត្រីអ៊ីស្រាអែល បេនចាមីន ណេតាន់យ៉ាហ៊ូ បាននិយាយថា ក្រុមហាម៉ាសមិនបានបង្ហាញពីការផ្តល់ជូនថ្មីសម្រាប់កិច្ចព្រមព្រៀងចំណាប់ថ្នូរនៅក្នុងកិច្ចពិភាក្សាទីក្រុងគែរ ទេ ហើយថាអ៊ីស្រាអែល នឹងមិនទទួលយក «ការទាមទារដ៏គួរឱ្យអស់សំណើច» របស់ក្រុមនេះឡើយ។

របាយការណ៍នេះបានដកស្រង់សម្តីការិយាល័យនាយករដ្ឋមន្ត្រី ដែលនិយាយបន្ទាប់ពីថ្ងៃទីពីរនៃកិច្ចចរចាអន្តរជាតិនៅទីក្រុងគែរ ដែលផ្ដោតលើការសម្របសម្រួលបទឈប់បាញ់ថា «ការផ្លាស់ប្តូរក្នុងជំហរបស់ក្រុមហាម៉ាស នឹងអាចធ្វើឱ្យកិច្ចពិភាក្សាឆ្ពោះទៅមុខ»។

ទូរទស្សន៍ ខាន់ ធីវី (Kan TV) គ្រប់គ្រងដោយរដ្ឋរបស់អ៊ីស្រាអែលបានរាយការណ៍ថា អេហ្ស៊ីបបានបន្តការចរចាបីថ្ងៃទៀតដើម្បីបន្តដោះស្រាយភាពខុសគ្នា។ ទោះបីជាយ៉ាងណា លោក ណេតាន់យ៉ាហ៊ូ មិនបានយល់ព្រមចំពោះការវិលត្រឡប់ទៅវិញរបស់ប្រធានចារកម្ម ម៉ូសាដ (Mossad) លោក ដេវីត បានៀ (David Barnea) ដែលបានចូលរួមកិច្ចពិភាក្សាកាលពីថ្ងៃអង្គារ ទៅកាន់ទីក្រុងគែរ នោះទេ។

អ៊ីស្រាអែលកំពុងប្រឈមមុខនឹងការអំពាវនាវកាន់តែខ្លាំងឡើងដើម្បីយល់ព្រមលើបទឈប់បាញ់មួយនៅតំបន់ហ្កាហ្សា ខណៈជម្លោះដ៏បង្ហូរឈាមរបស់ខ្លួនជាមួយក្រុមហាម៉ាស បានអូសបន្លាយជាង ៤ ខែ ហើយបានឆក់យកជីវិតប្រជាជនប៉ាឡេស្ទីនរាប់ម៉ឺននាក់៕