អ្នកស្រុកទីក្រុងហ្សាការតា នៅថ្ងៃព្រហស្បតិ៍ (ទី១៥ ខែកុម្ភៈ) នេះ បាននិយាយថា ពួកគេមានទាំងក្ដីសង្ឃឹម និងភាពមិនប្រាកដប្រជា ទាក់ទងនឹងលទ្ធផលបោះឆ្នោតប្រធានាធិបតីឥណ្ឌូនេស៊ី ដែលរដ្ឋមន្ត្រីការពារជាតិក្នុងតំណែង លោក Prabowo Subianto ប្រកាសជ័យជម្នះ។

អ្នកនាង Jessica Nathania វ័យ ៣២ឆ្នាំ បាននិយាយថា នាងសង្ឃឹមថា រដ្ឋាភិបាលនាពេលខាងមុខ នឹងគោរពលទ្ធិប្រជាធិបតេយ្យ។ ហើយអ្នកនាងបានបន្តថា៖ «ប្រជាជនមិនល្ងង់ដូចការគិតរបស់ពួកគេទេ។ ដូច្នេះខ្ញុំសង្ឃឹមថា អ្នកដឹកនាំទាំងអស់នឹងបំពេញការងាររបស់ខ្លួនបានល្អ»។

សូមបញ្ជាក់ថា យោងទៅតាម «ការរាប់សន្លឹកឆ្នោតភ្លាមៗ» ក្រៅផ្លូវការ ដោយទីភ្នាក់ងារស្ទង់មតិឯករាជ្យចំនួន៤ បានបង្ហាញថា លោក Prabowo ទទួលបានសំឡេងគាំទ្រប្រហែល ៥៨ភាគរយ។ យុទ្ធនាការរកសំឡេងឆ្នោតរបស់លោកក៏ត្រូវបានជំរុញផងដែរ ដោយការបញ្ចូលកូនប្រុសរបស់ប្រធានាធិបតីលោក Joko Widodo ឬ Jokowi ដ៏មានប្រជាប្រិយ គឺលោក Gibran Rakabuming Raka ជាមិត្តរួមតំណែងរបស់លោក។

អ្នកស្រុកមា្នក់ឈ្មោះ Azhari បានសម្តែងការសង្ស័យអំពីសមត្ថភាពរបស់លោក Gibran ក្រោយការបោះឆ្នោត។ អភិបាលក្រុង Surakarta វ័យ ៣៦ឆ្នាំរូបនេះ មិនមានលក្ខណៈសម្បត្តិគ្រប់គ្រាន់នោះទេ ដោយសារតែអាយុរបស់លោក រហូតដល់តុលាការធម្មនុញ្ញសម្រេចថា អ្នកណាដែលត្រូវបានជ្រើសរើសឲ្យកាន់តំណែងក្នុងតំបន់ អាចចូលរួមប្រកួតប្រជែងការបោះឆ្នោតឆ្នាំ២០២៤ ដោយមិនគិតពីអាយុ។

ការសម្រេចនេះបានបង្កឲ្យមានកំហឹង ហើយអ្នករិះគន់បានថ្កោលទោសចំពោះសុចរិតភាពរបស់តុលាការដែលបងថ្លៃរបស់លោក Jokowi ជារដ្ឋមន្ត្រីក្រសួងយុត្តិធម៌។ អ្នកស្រុកឈ្មោះ Azhari រូបនោះ បាននិយាយថា៖ «ប្រសិនបើ លោក Gibran អាចក្លាយជាបេក្ខជន នោះក៏មានន័យថា ខ្ញុំក៏អាចជាបេក្ខជនប្រធានាធិបតីផងដែរ»៕