ស្ថាប័នប្រឹក្សាជនជាតិជ្វីហ្វ CST នៅថ្ងៃព្រហស្បតិ៍ (ទី១៥ ខែកុម្ភៈ) នេះ បានឲ្យដឹងថា ចក្រភពអង់គ្លេសបានកើតមាននូវហេតុការណ៍ប្រឆាំងនឹងជនជាតិជ្វីហ្វរាប់ពាន់ករណី បន្ទាប់ពីផ្ទុះឡើងនូវសង្រ្គាម រវាងអ៊ីស្រាអែល និងក្រុមហាម៉ាស កាលពីខែតុលា ដែលធ្វើឲ្យឆ្នាំ២០២៣ ជាឆ្នាំដ៏អាក្រក់បំផុតសម្រាប់ការប្រឆាំងនឹងជនជាតិជ្វីហ្វនិយមរបស់ចក្រភពអង់គ្លេស គិតចាប់តាំងពីឆ្នាំ១៩៨៤ នៅពេលដែល CST បានចាប់ផ្តើមកត់ត្រាទិន្នន័យបែបនេះ។

ស្ថាប័ន Community Security Trust ឬ CST បានប្រាប់ថា ចំនួនឧប្បត្តិហេតុប្រឆាំងជនជាតិជ្វីហ្វនិយម នៅទូទាំងប្រទេស បានកើនឡើងដល់ ៤.១០៣ករណី ពោលគឺច្រើនជាង ២ដងនៃតួលេខក្នុងឆ្នាំ២០២២ ក្នុងពេលមានការកើនឡើងនៃការគំរាមកំហែង ការនិយាយក្នុងន័យស្អប់ខ្ពើម អំពើហិង្សា និងការបង្កការខូចខាតដល់ស្ថាប័ន និងទ្រព្យសម្បត្តិរបស់ជនជាតិជ្វីហ្វ។

CST ដែលផ្តល់ប្រឹក្សាដល់ជនជាតិជ្វីហ្វប្រមាណ ២៨០.០០០នាក់របស់ចក្រភពអង់គ្លេស ពាក់ព័ន្ធនឹងបញ្ហាសន្តិសុខ បានបញ្ជាក់ទៀតថា ២ភាគ៣ នៃករណីទាំងនោះ បានកើតឡើងនៅ ឬក្រោយថ្ងៃទី៧ ខែតុលា នៅពេលដែលពួកសកម្មប្រយុទ្ធហាម៉ាសបានវាយលុកយ៉ាងកំរោលឆ្លងកាត់អ៊ីស្រាអែលភាគខាងត្បូង ដោយបានសម្លាប់មនុស្ស ១.២០០នាក់ និងចាប់ចំណាប់ថ្នូរប្រហែល ២៥០នាក់។

CST បានបន្ថែមថា ទិន្នន័យរបស់ខ្លួននោះ បានលើកឡើងថា ការកើនឡើងនោះបានលេចចេញជាដំបូង ដើម្បីឆ្លុះបញ្ចាំងពីការប្រារព្ធការវាយប្រហាររបស់ក្រុមហាម៉ាស ជាជាងការខឹងសម្បា ចំពោះការសងសឹកដោយយោធារបស់អ៊ីស្រាអែល នៅក្នុងតំបន់ហ្កាហ្សា។ បើយោងតាមក្រសួងសុខាភិបាលដែលគ្រប់គ្រងដោយក្រុមហាម៉ាស នៅតំបន់ហ្កាហ្សា ដែលមិនផ្តល់ការវិភាគ សម្រាប់ការស្លាប់របស់យុទ្ធជននោះ បានឲ្យដឹងថា ជម្លោះនេះបានធ្វើឲ្យប្រជាជនប៉ាឡេស្ទីនយ៉ាងហោចណាស់ ២៨.០០០នាក់ បានបាត់បង់ជីវិត។

យ៉ាងណាក្ដី CST ដែលបានកត់ត្រាករណីប្រឆាំងនឹងជនជាតិជ្វីហ្វីនិយម នៅចក្រភពអង់គ្លេសអស់រយៈពេល ៤០ឆ្នាំមកហើយនោះ បាននិយាយថា ការកើនឡើងដែលបានកត់ត្រាទុក បន្ទាប់ពីថ្ងៃទី៧ ខែតុលាតែមួយគត់ គឺលើសចំនួនសរុបប្រចាំឆ្នាំកាលពីពេលមុនៗទាំងអស់៕