ប្រទេសអារ៉ាប់មួយចំនួន រួមទាំងប្រទេសអារ៉ាប់រួម កំពុងដាក់កំហិតកាន់តែខ្លាំងឡើងលើសហរដ្ឋអាមេរិក ពីការប្រើប្រាស់ទីតាំងយោធានៅលើដីរបស់ពួកគេ ដើម្បីបើកការវាយប្រហារតាមអាកាសសងសឹកទៅលើក្រុមតំណាងអ៊ីរ៉ង់ នេះបើយោងតាមមនុស្ស៤នាក់ដែលដឹងពីបញ្ហានេះ។

សហរដ្ឋអាមេរិក បានដាក់ពង្រាយទាហានរាប់ពាន់នាក់ជាយូរយារណាស់មកហើយ នៅតាមមូលដ្ឋាននានាក្នុងប្រទេសអារ៉ាប់រួម កូវ៉ែត អូម៉ង់ កាតា និងកន្លែងផ្សេងទៀត នៅមជ្ឈិមបូព៌ា ហើយតួនាទីរបស់ប្រទេសអារ៉ាប់ក្នុងការជួយដល់សកម្មភាពយោធារបស់សហរដ្ឋអាមេរិក បានស្ថិតនៅក្រោមការត្រួតពិនិត្យកាន់តែខ្លាំងឡើង ចាប់តាំងពីសង្គ្រាមអ៊ីស្រាអែល និងក្រុមហាម៉ាស ដែលបានផ្ទុះឡើងនៅក្នុងខែតុលា។

ជម្លោះនេះ បានធ្វើឲ្យប៉ះពាល់ដល់ផលប្រយោជន៍របស់រដ្ឋាភិបាលអារ៉ាប់ ក្នុងការបន្ធូរបន្ថយកំហឹងរបស់ពលរដ្ឋរបស់ពួកគេចំពោះអ៊ីស្រាអែលប្រឆាំងនឹងបំណងប្រាថ្នារបស់ពួកគេក្នុងការជួយក្រុងវ៉ាស៊ីនតោនទប់ទល់នឹងការវាយប្រហារដែលគាំទ្រដោយអ៊ីរ៉ង់។ ការរឹតបន្តឹងលើសកម្មភាពរបស់សហរដ្ឋអាមេរិក នៅលើដីរបស់ពួកគេ ឆ្លុះបញ្ចាំងពីការគណនារបស់អារ៉ាប់ស្តីពីរបៀបដែលពួកគេអាចមានការគាំទ្រ ដោយមិនធ្វើឲ្យអ៊ីរ៉ង់ខឹងឡើយ។

ព័ត៌មានដែលថា ប្រទេសមួយចំនួន កំពុងរឹតបន្តឹងការចូលទៅប្រើប្រាស់ទឹកដីរបស់ពួកគេ គឺផ្អែកលើព័ត៌មានរបស់មន្ត្រីអាមេរិក ជំនួយការសភា និងមន្ត្រីលោកខាងលិចពីររូប ដែលពួកគេត្រូវបានផ្តល់នូវភាពអនាមិកឲ្យពិភាក្សាអំពីបញ្ហាសន្តិសុខដ៏រសើបនេះ។