នៅថ្ងៃព្រហស្បតិ៍នេះ គ្រូពេទ្យប៉ាឡេស្ទីនម្នាក់បានចែករំលែករូបភាពវីដេអូឃ្លីបពីមន្ទីរពេទ្យ Nasser ស្ថិតក្នុងទីក្រុង Khan Younis នៅភាគខាងត្បូងតំបន់ហ្គាហ្សា ជាកន្លែងដែលផ្សែង និងស្នូរកាំភ្លើង កើតមាន ស្របពេលដែលអ្នកជំងឺរងរបួស ព្យាយាមរត់ចេញពីកម្ទេចកម្ទី ។ 

 នៅក្នុងវីដេអូនេះឃើញលោកវេជ្ជបណ្ឌិត Mohammed Harara និយាយថា ពួកយើងរងការវាយប្រហារដោយកងទ័ពអ៊ីស្រាអែល នៅក្នុងមន្ទីរពេទ្យ មុនពេលលោកប្រាប់ឲ្យអ្នកដទៃរកកន្លែងលាក់ខ្លួនគេចចេញពីគ្រាប់កាំភ្លើង ។ 

 ទីភ្នាក់ងារព័ត៌មានរ៉យទ័រអាចបញ្ជាក់ផ្ទៀងផ្ទាត់បានទីតាំងថតវីដេអូ និងអត្តសញ្ញាណរបស់គ្រូពេទ្យ ប៉ុន្តែពួកគេពុំអាចបញ្ជាក់កាលបរិច្ឆេត និងពេលវេលាថតវីដេអូបានឡើយ ។ 

 អ្នកស្រុក និងសាក្សីមួយចំនួននិយាយថា នៅពេលយប់ថ្ងៃពុធ ជនប៉ាឡេស្ទីនជាង ២ពាន់នាក់ដែលជ្រកកោននៅក្នុងមន្ទីរពេទ្យ Nasser បានធ្វើដំណើរទៅដល់ទីក្រុង Rafah ក្រោយកងទ័ពអ៊ីស្រាអែល បញ្ជាឲ្យជម្លៀសខ្លួនចេញ ។ 

 ខណៈពេលនោះដែរ ក្រសួងសុខាភិបាលដែលគ្រប់គ្រងដោយក្រុមហាម៉ាស់ បាននិយាយនៅក្នុងសេចក្តីថ្លែងការណ៍មួយកាលពីថ្ងៃពុធ ថា ចំនួនអ្នកស្លាប់របស់ជនប៉ាឡេស្ទីន នៅតំបន់ហ្គាហ្សាស្ទ្រីប បានកើនឡើងដល់ ២៨.៥៧៦ នាក់ និងមនុស្ស ៦៨.២៩១ នាក់ផ្សេងទៀត បានរងរបួស ចាប់តាំងពីជម្លោះអ៊ីស្រាអែល និងក្រុមហាម៉ាស់ បានផ្ទុះឡើងកាលពីថ្ងៃទី០៧ ខែតុលា ឆ្នាំ២០២៣ ។  

សេចក្តីរាយការណ៍បានឲ្យដឹងថា ក្នុងអំឡុងពេល ២៤ ម៉ោងចុងក្រោយនេះ កងទ័ពអ៊ីស្រាអែលបានសម្លាប់ជនប៉ាឡេស្ទីនចំនួន ១០៣ នាក់ និងមនុស្ស ១៤៥ នាក់ផ្សេងទៀតរងរបួស ។  

ដោយឡែក ប្រភពសន្តិសុខប៉ាឡេស្ទីនបានឲ្យដឹងថា យន្តហោះចម្បាំង និងកាំភ្លើងធំរបស់អ៊ីស្រាអែល បានធ្វើការវាយលុកផ្នែកផ្សេងៗជាច្រើននៅតំបន់បិទច្រកនេះ ៕