ភ្នំពេញ៖ គណបក្សនយោបាយនានា នៅថ្ងៃទី១៦ ខែកុម្ភៈ ឆ្នាំ២០២៤នេះ បានចេញ​សេចក្តី​ថ្លែង​ការណ៍​ថ្កោល​ទោសចំពោះទង្វើគំរាមកំហែង រំលោភការសម្ងាត់ និងធ្វើឱ្យបាត់ទំនុកចិត្តលើអង្គបោះឆ្នោត​សមាជិកព្រឹទ្ធសភាដែលធ្វើឡើងដោយគណបក្សភ្លើងទៀន។

យោងតាមសេចក្ដី​ថ្លែងការណ៍ គណបក្សនយោបាយនានា បានឱ្យដឹងថា ពួកគេបាន​សង្កេត​នឹង​តាម​ដាន​យ៉ាងយកចិត្តទុកដាក់អំពីដំណើរការឃោសនាបោះឆ្នោតសមាជិកសមាជិកព្រឹទ្ធសភា ក្នុង​នោះបានសង្កេតឃើញថា មានគណបក្សនយោបាយមួយបាននឹងកំពុងគំរាមកំហែង រំលោភ​ការ​សម្ងាត់ និងធ្វើឱ្យបាត់ទំនុកចិត្តលើការបោះឆ្នោតសមាជិកព្រឹទ្ធសភា។

ករណីនេះ គណបក្សនយោបាយនានា បានប្រកាសថ្កោលទោសចំពោះទង្វើគំរាមកំហែង ដែល​ផ្ទុយ​ពី​មាត្រា៧១ នៃច្បាប់ស្តីពីការបោះឆ្នោតជ្រើសតាំងសមាជិកព្រឹទ្ធសភា។ ទន្ទឹមគ្នានេះដែរ គណបក្ស នយោបាយនានា បានគាំទ្រ​យ៉ាង​ពេញ​ទំហឹង​ចំពោះ​សេចក្តីថ្លែងការណ៍​របស់​គណៈកម្មាធិការ​ជាតិ​រៀបចំការបោះឆ្នោតលេខ ០០២ គ.ជ.ប ចុះថ្ងៃទី១៥ ខែកុម្ភៈ ឆ្នាំ២០២៤ និង​គាំទ្រ​ចំពោះសេចក្តីប្រកាសព័ត៌មានរបស់ក្រសួងមហាផ្ទៃ លេខ ០០៤ សប្រក ចុះថ្ងៃ ទី១៥ ខែកុម្ភៈ ឆ្នាំ២០២៤ ដើម្បីធានាបាននូវ​ការ​អនុវត្ត​សិទ្ធិ​សេរីភាព​របស់​ប្រជាពលរដ្ឋខ្មែរ​តាម​រដ្ឋធម្មនុ​ញ​នៃ​ព្រះរាជាណាចក្រកម្ពុជា ព្រមទាំងធានាបាន​នូវនិរន្តរភាព នៃ​ដំណើរ​ការ​លទ្ធិប្រជាធិបតេយ្យ​នៅ​កម្ពុជា និងជាពិសេសធានាបាន នូវដំណើរការបោះឆ្នោត​ទៅ​យ៉ាង​រលូន​ដោយ​ពុំ​មាន​ការ​គំរាម​កំហែង បំភិតបំភ័យ។

គណបក្សនយោបាយនានាក៏បានស្នើដល់ក្រសួងមហាផ្ទៃ ឱ្យមានវិធានការចំពោះគណបក្សនយោបាយដែលកំពុងបង្កបញ្ហាដល់ការបោះឆ្នោតឱ្យបានតឹងរ៉ឹងបំផុត។ ហើយគណបក្សនយោបាយនានា បានប្ដេជ្ញាការពារសុខសន្តិភាពឱ្យបានល្អ និងអំពាវនាវដល់អង្គបោះឆ្នោតទាំងអស់ អញ្ជើញទៅបោះឆ្នោតទាំងអស់គ្នាដោយប្រើសិទ្ធរបស់ខ្លួនដើម្បីជ្រើសរើសសមាជិកព្រឹទ្ធសភាដែលខ្លួនពេញចិត្ត៕