ក្រសួងសង្គមកិច្ច អតីតយុទ្ធជន និងយុវនីតិសម្បទា កាលពីរសៀលថ្ងៃទី១៥ ខែកុម្ភៈ ឆ្នាំ២០២៤​នេះ បានចុះហត្ថលេខាលើកិច្ចព្រមព្រៀងអនុញ្ញាតឱ្យ សមាគម អង្គការ មិនមែនរដ្ឋាភិបាលចំនួន ៣០ ក្នុងការចូលរួមចំណែកជួយលើការងារសង្គមកិច្ចនៅកម្ពុជា។

ការកិច្ចចុះព្រមព្រៀងមនេះនឹងអនុវត្តលើគម្រោងអភិវឌ្ឍន៍នានា មានរយៈពេ ៣ឆ្នាំ ក្នុង​ទំហំ​ថវិកា​ជាង ១៨.៥ លានដុល្លារ ដោយអង្គការ​នីមួយៗ​ត្រូវ​បំពេញ​ការងារ​នៅ​តាម​ខេត្ត​គោល​ដៅរៀង​ៗ​ខ្លួន​។ អង្គការទាំង ៣០ ដែលបានចុះហត្ថលេខានេះ មានអង្គការអន្តរជាតិចំនួន ១៦ និងអង្គការ​ក្នុង​ស្រុក​ចំនួន១៤។

សមាគម អង្គការទាំង ៣០នេះនឹងធ្វើការលើវិស័យផ្សេងៗគ្នា ក្នុងនោះសមាគម និងអង្គការ​មិនមែន​រដ្ឋាភិបាលចំនួន ២០ អនុវត្តគម្រោង ពាក់ព័ន្ធលើវិស័យកុមារ ដែលមានថវិការសរុបជាង ៨ លានដុល្លារ។ សមាគម និងអង្គការចំនួន ៦ ផ្សេងទៀត អនុវត្តគម្រោងពាក់ព័ន្ធ លើវិស័យ​គាំ​ពារ​​ជន​រងគ្រោះមានថវិកាសរុបជិត ៨ លានដុល្លារ។ រីឯសមាគម និងអង្គការចំនួន ៤ ទៀត អនុវត្ត​គម្រោង ពាក់ព័ន្ធនឹងវិស័យកិច្ចការគ្រួសារដែលមានថវិកាសរុបជាង ២ លានដុល្លារ។

សម្រាប់​សកម្មភាពការងារ របស់សមាគម អង្គការទាំង ៣០នេះ នឹងផ្ដល់ជាអត្ថប្រយោជន៍ ជួយ​ដល់​ក្រុម​គោលដៅសរុបជាង ៨ ម៉ឺននាក់ និង ៣៧៦ គ្រួសារ។ ក្នុងគម្រោងទាំង ៣០ នេះ​ក៏​មាន​បុគ្គលិក​ខ្មែរ​ដែលធ្វើការឱ្យគម្រោងចំនួនជិត ៦០០នាក់ផងដែរ។

ឱកាស​នោះឯកឧត្តម ស៊ូនី វង្សវីស្សិត រដ្ឋលេខាធិការក្រសួងសង្គមកិច្ច បានថ្លែង​អំណរ​គុណ​ចំពោះ​បណ្តា​សមាគម និងអង្គការមិនមែនរដ្ឋាភិបាលទាំងអស់ ដែលបាន​សហការ​ល្អ​ជា​មួយ​ក្រសួង​សង្គម​កិច្ចនាពេលកន្លងមក។ ពិសេសគឺបន្តខិតខំស្វែងរកមូលនិធិ បន្តអនុវត្តគម្រោង ជា​ប្រយោជន៍​ជួយគាំពារ និងអភិវឌ្ឍន៍ដល់ស្ត្រី កុមារ ជនរងគ្រោះ និងងាយរងគ្រោះ គ្រួសារក្រីក្រ ដើម្បី​ចូលរួមចំណែក ជាមួយរាជរដ្ឋាភិបាល ក្នុងការអភិវឌ្ឍន៍សង្គមសេដ្ឋកិច្ច ស្របតាម​យុទ្ធសាស្ត្រ​អភិវឌ្ឍន៍ជាតិរបស់រាជរដ្ឋាភិបាលកម្ពុជា។

ឯកឧត្ដមបាន​ចាត់ទុកថា សមាគម និងអង្គការមិនមែនរដ្ឋាភិបាលជាតិ-អន្តរជាតិ គឺជាដៃគូ​សំខាន់​មិន​អាច​ខ្វះ​បានក្នុងការចូលរួមចំណែកអភិវឌ្ឍប្រទេសជាតិ ជាពិសេស​រាជរដ្ឋាភិបាល​នីតិកាលទី​៧ ដែលមានសម្តេចធិបតី ហ៊ុន ម៉ាណែត ជានាយករដ្ឋមន្ត្រី បានប្រកាសពង្រឹង និង​ពង្រីក​ភាព​ជាដៃ​គូ​ជាមួយអង្គការសង្គមស៊ីវិល និងអង្គការមិនមែនរដ្ឋាភិបាល ក្នុងក្រប​ខណ្ឌ​ច្បាប់​ស្តីពី​សមាគម និងអង្គការមិនមែនរដ្ឋាភិបាលដើម្បីលើកកម្ពស់នីតិរដ្ឋ ពង្រឹងលទ្ធិប្រជាធិបតេយ្យ និង​ចូល​រួម​ចំណែកអភិវឌ្ឍន៍សង្គម-សេដ្ឋកិច្ចរបស់កម្ពុជា។

សូម​ជម្រាបថា បច្ចុប្បន្នមានអង្គការ សមាគមប្រមាណ ១៤២ ដែលបាន​ចុះ​កិច្ច​ព្រម​ព្រៀង​អនុវត្ត​គម្រោង ជាមួយក្រសួងសង្គមកិច្ចអតីតយុទ្ធ និងយុវនីតិសម្បទា ក្នុងនោះអង្គការ​ធ្វើ​ការ​លើ​វិស័យ​កុមារ​ចំនួន ៩១អង្គការ លើកិច្ចការគាំពារជនរងគ្រោះចំនួន ១៥ អង្គការ និងកិច្ចការគ្រួសារចំនួន ១៧ និងតាមវិស័យផ្សេងៗមួយចំនួនទៀត៕ អត្ថបទ៖ គឹម ហុក