ក្រុមប្រជាកសិករប៉ូឡូញបានដុតសំបងកង់រថយន្តនៅលើកាំជណ្ដើរការិយាល័យរដ្ឋាភិបាលក្នុងតំបន់ និងបានគប់ស៊ុតទៅលើការិយាល័យគណៈកម្មការអឺរ៉ុប នៅក្នុងទីក្រុង រ៉ូក្លាវ (Wroclaw)ភាគខាងលិចកាលពីថ្ងៃព្រហស្បតិ៍ ថ្ងៃទី ១៥ ខែកុម្ភៈ សប្ដាហ៍នេះ ខណៈពួកគេតវ៉ាប្រឆាំងនឹងកិច្ចព្រមព្រៀងបៃតងរបស់សហភាពអឺរ៉ុប។

កសិករនៅទូទាំងទ្វីបអឺរ៉ុបកំពុងតវ៉ាប្រឆាំងនឹងឧបសគ្គដែលដាក់លើពួកគេដោយវិធានការរបស់សហភាពអឺរ៉ុបដើម្បីដោះស្រាយការប្រែប្រួលអាកាសធាតុ ក៏ដូចជាការកើនឡើងនៃការចំណាយក្នុងជីវភាពរស់នៅប្រចាំថ្ងៃ និងជាអ្វីដែលពួកគេនិយាយថាគឺជាការប្រកួតប្រជែងមិនយុត្តិធម៌ពីបរទេស ជាពិសេសអ៊ុយក្រែន។

យោងតាមអ្នករៀបចំបាតុកម្ម មានអ្នកតវ៉ាចូលរួមប្រហែល ១ពាន់នាក់ និងត្រាក់ទ័រ ៥០០គ្រឿង និងរថយន្តកសិកម្មផ្សេងទៀតនៅក្នុងបាតុកម្មនោះ។

វីដេអូពីទូរទស្សន៍ឯកជន TVN24 បានបង្ហាញក្រុមបាតុករដើរដង្ហែតាមដងផ្លូវដោយកាន់ទង់ជាតិប៉ូឡូញ បដា និងមានការដុតបំពួកភ្លើងផងដែរ។ ក្រុមប្រជាកសិករបានប្រមូលផ្តុំគ្នានៅមុខទីស្នាក់ការរដ្ឋាភិបាលប្រចាំតំបន់ ជាកន្លែងដែលពួកគេដុតសំបងកង់រថយន្ត បង្កឲ្យមានផ្សែងហុយឡើងលើអាកាស។

ទោះបីជាអ្នករៀបចំស្នើឱ្យបំបែកជួរក៏ដោយ វីដេអូបង្ហាញថា មនុស្សជាច្រើនពុំបានបំបែកគ្នានោះទេ។

កសិករប៉ូឡូញគ្រោងបិទច្រកព្រំដែនទាំងអស់ជាមួយអ៊ុយក្រែន និងការតវ៉ាដ៏ធំមួយនៅក្នុងរដ្ឋធានី វ៉ាសូវី នៅថ្ងៃទី២០ ខែកុម្ភៈខាងមុខ៕