ឯកឧត្តមសាស្រ្តាចារ្យ ងី ម៉េង នាយកមនី្ទរពេទ្យមិត្តភាពខ្មែរ-សូវៀត បានអះអាងថា មនី្ទរ​ពេទ្យ​មិត្តភាព​ខ្មែរ-សូវៀត បានផ្តោតលើគោលដៅចម្បងធំៗ ចំនួន៤ ក្នុងការផ្តល់សេវាពិនិត្យ ព្យាបាល​ថែទាំ​ជូន​ដល់ប្រជាពលរដ្ឋដោយមិនរើសអើង ប្រកាន់យកគុណភាព និងប្រសិទ្ធភាពខ្ពស់។

ឯកឧត្តមសាស្រ្តាចារ្យ ងី ម៉េង តាមរយៈកិច្ចសម្ភាសន៍ជាមួយទូរទស្សន៍ BTV នៅថ្ងៃទី១៦ ខែកុម្ភៈ​នេះ​បាន​បញ្ជាក់ថា មនី្ទរពេទ្យមិត្តភាពខ្មែរ-សូវៀត មានផែនការ យុទ្ធសាស្រ្ត និងបេសកកម្ម​ជា​ច្រើន​ដែល​ត្រូវធ្វើ។ ក្នុងនោះ ទី១ គឺការពង្រឹងសេវា ដើម្បីឲ្យ​ប្រជាពលរដ្ឋ​អញ្ជើញ​មក​ទទួល​សេវា​ពិនិត្យ ព្យាបាលជំងឺអាចទទួលយកបាន។ ទី២ ពង្រឹងគុណភាព និងប្រសិទ្ធភាព​ក្នុង​ការព្យាបាល​ជំងឺ។​ ទី៣ គឺការបណ្តុះបណ្តា​ល​បុគ្គលិក​សុខាភិបាល​ឲ្យ​កាន់​តែ​មាន​ជំនាញ​ក្នុង​វិស័យ​សុខាភិបាល​មិន​ឲ្យចាញ់ប្រទេសជិតខាង និងទី៤ បន្តបណ្តុះបណ្តាលក្រុមការងារគ្រូពេទ្យ និស្សិត​ពេទ្យ ដែលជាទំពាំងស្នងឫស្សីនាពេលអនាគត។

ជាចុងក្រោយក្នុងនាមថ្នាក់ដឹកនាំ ក៏ដូចជាបុគ្គលិកសុខាភិបាលនៃមនី្ទរពេទ្យមិត្តភាពខ្មែរ-សូវៀត ឯកឧត្តមសាស្រ្តាចារ្យ ងី ម៉េង បញ្ជាក់ថា ក្នុងឆ្នាំ២០២៤ និងឆ្នាំបន្តបន្ទាប់ទៅមុខទៀតនេះ មន្ទីរ​ពេទ្យ​ខិតខំពង្រឹងសេវាពិនិត្យ ព្យាបាលអ្នកជំងឺប្រកបដោយគុណភាព សុវត្ថិភាព ប្រសិទ្ធភាព ស័ក្តិ​សិទ្ធិភាព និងសមធម៌ ដោយស្របតាមផែនការយុទ្ធសាស្រ្តគន្លឹះ៩ចំណុច និងអាទិភាព ៣ចំណុច ដែល​បានដាក់ចេញ ស្របតាមគោលនយោបាយរបស់រាជរដ្ឋាភិបាលកម្ពុជា ក្រោម​ការ​ដឹកនាំ​ប្រកប​ដោយ​គតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជា​ណា​ចក្រ​កម្ពុជា៕ អត្ថបទ រដ្ឋា