កំពង់ឆ្នាំង៖ ប្រជាពលរដ្ឋ មន្ត្រីរាជការ រស់នៅខេត្តកំពង់ឆ្នាំង បានបង្ហាញអារម្មណ៍​រីករាយ និង​សាទរ​​លើវិធានការក្តៅរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី​នៃ​ព្រះរាជាណា​ចក្រ​កម្ពុជា ​ដែលបានចេញបញ្ជាឱ្យអភិបាលរាជធានី-ខេត្តទាំងអស់ នៅទូទាំងប្រទេសកម្ពុជា ត្រួត​ពិនិត្យ​ជា​បន្ទាន់ លើទីតាំងល្បែងផ្សងសំណាង។ ក្នុងករណីមានបន្តបើកថ្មីទៀត ត្រូវចាត់វិធាន​ការ​បិទ​ជា​បន្ទាន់ និងរាយការណ៍ផ្ទាល់ជូនសម្តេច ។ ពួកគាត់សប្បាយចិត្តបាន​គាំទ្រពេញ​ទំហឹង​នូវ​អនុសាសន៍​នេះ ហើយសង្ឃឹមថា សន្តិសុខនៅតាមមូលដ្ឋាននឹងរឹតតែល្អជាងមុន។

ប្រជាពលរដ្ឋមន្ត្រីរាជការបានបន្តថា កន្លងមកល្បែងស៊ីសងទាំងនោះ មានទាំងស្របច្បាប់ និង​គ្មាន​ច្បាប់​ដូចជា ល្បែងឆ្នោតកន្ទុយលេខគ្រប់ប្រភេទ ឆ្នោតឡូតូ និងល្បែង​ស៊ី​សង​ជា​ច្រើន​ប្រភេទ​ទៀត គឺកើតមាន នៅតាមទីប្រជុំជនក្នុងក្រុង ទីផ្សារ ទីតាំងលក់កាហ្វេជាដើម។ ការ​បិទ​ទីតាំង​ល្បែង​ទាំង​នោះនាំ អាចធ្វើអោយសិស្សសាលាមួយចំនួន អាចវិលមករកការសិក្សាវិញ និង​នាំ​អោយ​មាន​សន្តិសុខល្អនៅតាមមូលដ្ឋាន។

លោកឧត្តមសេនីយ៍ទោ ខូវ លី ស្នងការនៃស្នងការដ្ឋាននគរបាលខេត្តកំពង់ឆ្នាំង បានឲ្យដឹងថា នៅ​ក្នុង​ខេត្តកំពង់ឆ្នាំងមានទីតាំងល្បែងឡូតូមានច្បាប់ចំនួន៥៦ទីតាំង ដូចជាស្រុក​ទឹក​ផុស​៩​ទីតាំង​, ស្រុករលាប្អៀរ២ទីតាំង, ស្រុកំពង់លែង១៣ទីតាំង, ស្រុកកំពង់ត្រឡាច៧ទីតាំង, ស្រុក​សាមគ្គី​មានជ័យ ៤ទីតាំង, ស្រុកជលគីរី៧ទីតាំង, ស្រុកបរិបូណ៌៨ទីតាំង, និងក្រុង​កំពង់ឆ្នាំង​មាន​៦ទីតាំង។ លោកស្នងការនគរបាលខេត្តកំពង់ឆ្នាំង នឹងបើកកិច្ច​ប្រជុំ​បន្ទាន់​មួយ​នៅ​ម៉ោង​២ថ្ងៃ​នេះ​ជាមួយ​អធិការក្រុងស្រុក ដើម្បីបង្ក្រាបល្បែងស៊ីសងអត់ច្បាប់នៅក្នុងខេត្តអោយអស់។

ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានថ្លែងថា៖ នៅល្ងាចថ្ងៃទី១៥ ខែកុម្ភៈ ឆ្នាំ​២០២៤​នេះ រដ្ឋបាលខេត្តកំពង់ឆ្នាំង បានបើកកិច្ចប្រជុំបន្ទាន់មួយជាមួយអាជ្ញាធរក្រុងស្រុកទាំង៨ ទូទាំង​ខេត្តកំពង់ឆ្នាំង រួមនិងស្នងការដ្ឋាននគរបាលខេត្ត ដើម្បីត្រួត​ពិនិ​ត្យ​ទីតាំង​ល្បែង​ផ្សង​សំណាង នៅតាមមូលដ្ឋាន និងចាត់វិធានការបិទជាបន្ទាន់ ក្នុងករណីមានបន្តបើកថ្មីៗទៀត។ កិច្ច​ប្រជុំ​នេះ ធ្វើឡើងក្រោយទទួលបានប្រសាសន៍ណែនាំយ៉ាងម៉ឺងម៉ាត់ ពីសំណាក់សម្ដេចបវរធិបតី ហ៊ុន ម៉ាណែត នាយករដ្ឋមន្ត្រី ជុំវិញការផ្អាករាល់ការចេញអាជ្ញាប័ណ្ណ ឬការ​ផ្ដល់​សិទ្ធិ​បើក​ទីតាំង​ល្បែង​ផ្សង​សំណាង នៅតាមមូលដ្ឋាន។

សម្ដេចនាយករដ្ឋមន្ត្រី បានដាក់បទបញ្ជាដល់អភិបាលរាជធានីខេត្តទាំងអស់ អោយ​ចាត់​វិធា​នកា​​រ​ជាប​ន្ទាន់ ដើម្បីត្រួតពិនិត្យទីតាំងល្បែងផ្សងសំណាងនៅតាមមូលដ្ឋាននៃដែនសមត្ថកិច្ចរបស់ខ្លួន ក្នុង​ករណីមានបន្តបើកថ្មីៗទៀត ត្រូវចាត់វិធានការបិទជាបន្ទាន់ ហើយរាយការណ៍មកសម្ដេច ដើម្បី​ចាត់​វិធានការបន្ត ដែលអាចឈានដល់ការដកអាជ្ញាបណ្ណនៅក្នុងខេត្ត ឬនៅទូទាំង​ប្រទេស​តែម្ដង​៕ អត្ថបទ៖ កាំង ហុងវាស្នា