ភ្នំពេញ៖ គណប្រតិភូកម្ពុជា ដឹកនាំដោយឯកឧត្តម ងួន ស្ដេចភក្តី រដ្ឋលេខាធិការក្រសួងធម្មការ និង​សាសនា និងជាសាកលវិទ្យាធិការរង នៃពុទ្ធិកសាកលវិទ្យាល័យព្រះសីហមុនីរាជា ចូលរួម ក្នុង​សន្និសីទ​ស្រាវជ្រាវអន្តរជាតិ និងកិច្ចសហប្រតិត្តការ អនុស្សរណៈនៃកាយោគយល់គ្នា រវាងកម្ពុជា-ថៃ ទៅលើវិស័យអបរំលើកទី៧ ឆ្នាំ២០២៤ នាសាកលវិទ្យាល័យ Buriram Rajabhat នៃ​ប្រទេស​ថៃ។

សន្និសីទនេះ ដែលធ្វើឡើងចាប់ពីថ្ងៃទី១៤ ដល់ទី១៧ ខែកុម្ភៈ ឆ្នាំ២០២៤ លោកសាស្ត្រាចារ្យ ជ័យ សារិន អគ្គាធិការ នៃក្រសួងអប់រំ យុវជន និងកីឡា លើកឡើងថា សន្និសីទនេះ បាន​បើក​ឱកាស​ដល់​យុវជន ធ្វើបទបង្ហាញនូវស្នាដៃស្រាវជ្រាវរបស់ខ្លួន ដែលស្រាវជ្រាវកន្លងមក ហើយជឿ​ជាក់​កម្ម​វិធីនេះ ក៏ជាបទពិសោធន៍សម្រាប់ពុទ្ធិកសាកលវិទ្យាល័យព្រះសីហមុនីរាជា ក្នុងការ​រៀបចំ​ឲ្យ​មាន​សន្និសីទ​បែបនេះ ហើយអាចឲ្យនិស្សិតកម្ពុជា ឡើងធ្វើបទ​បង្ហាញ​ពី​ការ​ស្រាវជ្រាវ​របស់​ពួក​គេ ក៏ដូចជាមានការចូលរួមពីសាស្ត្រាចារ្យបណ្ឌិតជាច្រើនរូប ដើម្បីធ្វើជាវាគ្មិន ហើយវា​យ​តម្លៃ​ពី​ស្នាដៃ​ទាំង​អស់នោះ។

លោកសាស្ត្រាចារ្យបានបន្តថា យុវជន ឬនិស្សិតកម្ពុជា ដែលចង់ការពារសារណា ឬនិក្ខេបទផ្នែក​បណ្ឌិត​របស់​ខ្លួន ក៏អាចតាមដានពីសន្និសីទនេះ ដើម្បីបានជាបទពិសោធន៍ ព្រោះសន្និសីទ​ក៏​មាន​ការ​ចូលរួម​ពីសាស្ត្រាចារ្យថ្នាក់អាស៊ាន តំបន់ និងអន្តរជាតិ មកធ្វើការវាយតម្លៃផងដែរ ។

ចំណែក​លោកសាស្ត្រាចារ្យ មុំ រាជសោភា ចៅក្រមសាលាឧទ្ធរណ៍ខេត្តបាត់ដំបង បានលើក​ឡើង​ថា សន្និសីទនេះ គឺពិតជាផ្ដល់ឱកាសល្អ សម្រាប់សាកលវិទ្យាល័យនៅកម្ពុជា បាន​ជួប​ជាមួយ​សាកល​វិទ្យាល័យ​នានានៅក្រៅប្រទេស ក្នុងការទទួលនូវបទពិសោធន៍ លើការងារស្រាវជ្រាវ​ពីគ្នា​ទៅ​វិញ​ទៅ​មក។

ក្នុងនាមសាស្ត្រាចារ្យ នៃពុទ្ធិកសាកលវិទ្យាល័យព្រះសីហមុនីរាជា លោក មុំ រាជសោភា នឹងដក​ស្រង​ចំណេះ​ដឹង ឬបទពិសោធន៍នានា នៃសន្នសីទថ្នាក់អន្តរជាតិនេះ មកពង្រឹងការបង្រៀន ដើម្បីផ្ដល់​ចំណេះដឹងដល់និស្សិតកម្ពុជា ឲ្យកាន់តែល្អប្រសើរជាងមុន ហើយក៏ជំរុញ ដល់និស្សិត​កម្ពុជា ត្រូវខិតខំយកចិត្តទុកដាក់លើការស្រាវជ្រាវ ព្រោះអាចជួយបំពេញចន្លោះបន្ថែម ក្នុង​និក្ខេ​បទ​របស់ខ្លួន។

គួរបញ្ជាក់ថា ការចូលរួមក្នុងសន្និសីទនេះ គឺធ្វើឡើងក្នុងគោលបំណង ផ្សព្វផ្សាយពីកាសិក្សា និង​លទ្ធផលស្រាវជ្រាវថ្នាក់បណ្ឌិត និងអន្តរជាតិ នៃពុទ្ធិកសាកលវិទ្យាល័យព្រះសីហមុនីរាជា ក្នុង​វេទិកា​អន្តរជាតិ រួមទាំងពង្រឹង និងពង្រីក កិច្ចសហប្រតិបត្តិការជាមួយដៃគូរទាំងក្នុងឆាកតំបន់ និង​អន្តរជាតិ ស្របតាមគោលនយោបាយ របស់ក្រសួងធម្មការ និងសាសនា ក៏ដូចជា​រាជ​រដ្ឋាភិបាល​កម្ពុជា ជាមួយនិងការផ្តាស់ប្តូ ស្វែយល់ និងបង្កើតបទ​ពិសោធន៍​បន្ថែម​ដើម្បី​ធានា​បាន​នៅ​គុណភាព និងប្រសិទ្ធភាព នៃកាគ្រប់គ្រងដំណើរការ ថ្នាក់អប់រំឧត្តមសិក្សា ខណៈ​មាន​សាកល​វិទ្យាល័យមកពី ១៨ប្រទេស បានចូលរួម៕ អត្ថបទ បាន សុខរិទ្ធិ