ប្រភពចំនួនបួនបាននិយាយថា អេហ្ស៊ីបកំពុងរៀបចំតំបន់មួយនៅព្រំដែនហ្កាហ្សា ដែលអាចឲ្យជនជាតិប៉ាឡេស្ទីនស្នាក់នៅ ក្នុងករណីមានការវាយលុករបស់អ៊ីស្រាអែល ចូលទៅក្នុងក្រុងរ៉ាហ្វា (Rafah) ជំរុញឱ្យមានជនភៀសខ្លួនឆ្លងកាត់ព្រំដែន នៅក្នុងអ្វីដែលពួកគេបានពណ៌នាថាជាវិធានការបន្ទាន់របស់ទីក្រុងគែរ (Cairo) ។

អេហ្ស៊ីប ដែលបដិសេធថាមិនបានធ្វើការរៀបចំបែបនេះ បានលើកឡើងម្តងហើយម្តងទៀតអំពីលទ្ធភាពដែលការវាយលុកនៅតំបន់ហ្កាហ្សាដ៏បំផ្លិចបំផ្លាញរបស់អ៊ីស្រាអែល អាចរុញច្រានប្រជាជនប៉ាឡេស្ទីនចូលទៅក្នុងឧបទ្វីបស៊ីណៃ ដោយនោះជាអ្វីដែលទីក្រុងគែរ និយាយថាមិនអាចទទួលយកបានឡើយ ដោយជំរុញឲ្យមានការព្រមានពីបណ្ដារដ្ឋអារ៉ាប់ ដូចជាប្រទេសហ្ស៊កដានី ជាដើម។

ប្រភពមួយបាននិយាយថា អេហ្ស៊ីប មានសុទិដ្ឋិនិយមលើការចរចាដើម្បីសម្រេចបានបទឈប់បាញ់មួយហើយអាចបញ្ចៀសពីសេណារីយ៉ូបែបនេះ ប៉ុន្តែនៅតែកំពុងបង្កើតតំបន់នៅព្រំដែនជាវិធានការបណ្ដោះអាសន្ន និងការប្រុងប្រយ័ត្ន។

ប្រភពសន្តិសុខចំនួនបីបាននិយាយថា អេហ្ស៊ីបបានចាប់ផ្តើមរៀបចំតំបន់វាលខ្សាច់ដោយមានសម្ភារៈមូលដ្ឋានមួយចំនួនដែលអាចប្រើសម្រាប់ផ្តល់ជម្រកដល់ប្រជាជនប៉ាឡេស្ទីន ដោយសង្កត់ធ្ងន់ថានេះគឺជារឿងដែលជៀសមិនរួច៕