ទីភ្នាក់ងារសារព័ត៌មានឥណ្ឌា PTI បានរាយការណ៍នៅថ្ងៃសុក្រ (១៦ កុម្ភៈ) នេះថា អគ្គិភ័យដ៏ធំមួយបានឆាបឆេះរោងចក្រថ្នាំលាបមួយក្នុងរដ្ឋធានី ញូវដេលី (New Delhi) របស់ប្រទេសឥណ្ឌា ដោយបានសម្លាប់មនុស្សយ៉ាងហោចណាស់ ១១ នាក់ និងបណ្តាលឲ្យមនុស្ស ៤ នាក់ផ្សេងទៀតរងរបួស។

ក្រុមមន្ត្រីពន្លត់អគ្គិភ័យបានឲ្យដឹងថា អគ្គិភ័យនេះបានកើតឡើងកាលពីល្ងាចថ្ងៃព្រហស្បតិ៍ នៅជាន់ផ្ទាល់ដីនៃរោងចក្រ ដោយបានធ្វើឲ្យជនរងគ្រោះនៅជាន់ខាងលើត្រូវជាប់គាំងដោយគ្មានផ្លូវចេញក្រៅ។ អគាររោងចក្រ ដែលរួមមានឃ្លាំងផ្ទុកសារធាតុគីមីមួយនេះ មានទីតាំងនៅតំបន់ អាលីពួរ (Alipur) ក្នុងភាគខាងជើងទីក្រុង ញូវដេលី។

មូលហេតុនៃការឆេះនេះមិនទាន់ដឹងច្បាស់នៅឡើយទេ។ សាកសពជនរងគ្រោះទាំង ១១ នាក់ ត្រូវបានទាញចេញពីគំនរបាក់បែក បន្ទាប់ពីរថយន្តពន្លត់អគ្គិភ័យចំនួន ២២គ្រឿង បានពន្លត់អណ្តាតភ្លើង បន្ទាប់ពីបានប្រតិបត្តិការអស់រយៈពេលជាង ៥ ម៉ោង។ ជនរងគ្រោះមិនទាន់ស្គាល់អត្តសញ្ញាណនៅឡើយទេ។

អគ្គិភ័យគឺជារឿងធម្មតានៅក្នុងប្រទេសឥណ្ឌា ជាទីដែលច្បាប់សាងសង់ និងបទដ្ឋានសុវត្ថិភាពជារឿយៗមិនត្រូវបានយកចិត្តទុកដាក់ពីអ្នកសាងសង់ និងអ្នករស់នៅឡើយ៕