គណបក្សប្រឆាំងរបស់ចក្រភពអង់គ្លេស គឺគណបក្សការងារ បានឈ្នះការប្រកួតប្រជែងតួនាទីសមាជិកសភាថ្មី ២រូប នៅថ្ងៃសុក្រ (ទី១៦ ខែកុម្ភៈ) នេះ ដោយលទ្ធផលនេះនៃការបោះឆ្នោតពិសេសនេះបានផ្ដល់ផលប៉ះពាល់យ៉ាងធ្ងន់ធ្ងរដល់ក្រុមអភិរក្សនិយមរបស់នាយករដ្ឋមន្ត្រីលោក Rishi Sunak នៅមុនការបោះឆ្នោតជាតិ នាចុងឆ្នាំនេះ។

ការបរាជ័យទ្វេដងបានបង្ហាញឲ្យឃើញយ៉ាងច្បាស់ៗពីយីអ៊ុនដាក់ (ជោគវាសនាធ្លាក់ចុះ) របស់គណបក្សកាន់អំណាច ហើយនឹងមិនអាចកាត់បន្ថយការវាយប្រហារលើលោក Sunak ពីអ្នករិះគន់នានា ដែលខ្លាចក្រុមអភិរក្សអាចប្រឈមនឹងការបំផ្លាញទាំងស្រុង នៅក្នុងការបោះឆ្នោតជាតិ ហើយចង់ឲ្យរូបលោកផ្លាស់ប្តូរទិសដៅ។

អតីតបុគ្គលិកធនាគារវិនិយោគវ័យ ៤៣ឆ្នាំរូបនេះ បានជួបនឹងការពិបាកក្នុងការស្ដារជោគវាសនារបស់គណបក្សឡើងវិញ បើទោះបីជាបានផ្លាស់ប្តូរខ្លួនឯងនៅចំណុចផ្សេងៗជាច្រើន កាលពីឆ្នាំមុន ក្នុងនាមជាអ្នកកំណែទម្រង់ដ៏ក្លាហាន ជាអ្នកបច្ចេកទេសដ៏មានស្ថិរភាព ហើយឥឡូវនេះជាអ្នកដែលត្រូវការពេលវេលាបន្ថែមទៀត «ដើម្បីធ្វើតាមផែនការ» ពីព្រោះលោកនិយាយថា ផែនការនោះកំពុងដំណើរការហើយ។

តែដោយគណបក្សការងារនៅតែនាំមុខក្នុងការបោះឆ្នោត លោក Sunak ប្រហែលជាត្រូវបត់បែនទៅតាមការទាមទាររបស់សមាជិកខ្លះ នៅក្នុងគណបក្សរបស់លោក ដើម្បីបង្ហាញរបៀបវារៈរបស់ក្រុមអភិរក្សស្តាំនិយមបន្ថែមទៀតដល់អ្នកបោះឆ្នោតដែលមិនពេញចិត្តកាន់តែខ្លាំងឡើងៗ នៅមុនការបោះឆ្នោត។

ប្រធានគណបក្សការងារលោក Keir Starmer បាននិយាយនៅក្នុងសេចក្តីថ្លែងការណ៍ថា៖ «តាមរយៈការឈ្នះទីតាំងសំខាន់ៗពីគណបក្ស Tory យើងអាចនិយាយដោយទំនុកចិត្តថា គណបក្សការងារបានត្រឡប់មកវិញនៅក្នុងសេវាកម្មធ្វើការបម្រើប្រជាជន ហើយយើងនឹងធ្វើការឲ្យអស់ពីកម្លាំងកាយចិត្ត ដើម្បីបម្រើពួកគេ»។

នៅទីក្រុង Wellingborough ភាគកណ្តាលនៃប្រទេសអង់គ្លេស គណបក្សការងារបានផ្តួលក្រុមអភិរក្ស ដើម្បីឈ្នះអាសនៈសភា ដោយទទួលបានសំឡេងឆ្នោត ១៣.៨៤៤សំឡេង ទល់នឹង ៧.៤០៨សំឡេងរបស់បេក្ខជនរបស់គណបក្សអភិរក្សនិយម។ នៅក្រុង Kingswood ភាគនិរតីអង់គ្លេស គណបក្សការងារបានឈ្នះ ១១.១៧៦សំឡេង ទល់នឹង ៨.៦៧៥សំឡេងរបស់បេក្ខជនអភិរក្សនិយម។

គួរបញ្ជាក់ដែរថា គណបក្សអភិរក្សបានឈ្នះតែ ៤ដងប៉ុណ្ណោះ ក្នុងចំណោមការបោះឆ្នោតជ្រើសរើស ២១ដង គិតចាប់តាំងពីការបោះឆ្នោតជាតិចុងក្រោយ ក្នុងឆ្នាំ២០១៩៕