រដ្ឋអាជ្ញាពិសេសដែលស៊ើបអង្កេតលើករណីរបស់លោក Hunter Biden បានចោទប្រកាន់អតីតអ្នកផ្តល់ព័ត៌មានរបស់ FBI (ការិយាល័យស៊ើបអង្កេតសហព័ន្ធ) ពីបទប្រឌិតការអះអាងដែលថា ប្រធានាធិបតីលោក Joe Biden និងកូនប្រុសរបស់លោកម្នាក់ៗ បានស្វែងរកសំណូកចំនួន ៥លានដុល្លារអាមេរិកពីបណ្ដាក្រុមហ៊ុនអ៊ុយក្រែន។ បទចោទនេះជាឧបសគ្គដ៏ធំមួយ សម្រាប់សមាជិកគណបក្សសាធារណរដ្ឋដែលបានលើកឡើងពីការចោទប្រកាន់នៅក្នុងការជំរុញរបស់ខ្លួន ដើម្បីចោទប្រកាន់លោកប្រធានាធិបតី។

អ្នកផ្តល់ព័ត៌មានជាយូរមកហើយ គឺលោក Alexander Smirnov វ័យ ៤៣ឆ្នាំ ត្រូវបានចោទប្រកាន់ពីបទប្រាប់ FBI មិនពិតដែលថា លោក Hunter Biden ដែលក្រោយមកក្លាយជាសមាជិកក្រុមប្រឹក្សាភិបាលនៃក្រុមហ៊ុនថាមពលដ៏ធំបំផុត Burisma បានទាមទារប្រាក់ជាថ្នូរនឹងការពារក្រុមហ៊ុនពីការស៊ើបអង្កេតដោយអគ្គរដ្ឋអាជ្ញារបស់ប្រទេសនេះ នាពេលនោះ។

ការលើកឡើងដ៏នឹកស្មានមិនដល់ដែលហាក់ដូចជាមកជួយគាំទ្រលើការអះអាងគ្មានភស្តុតាងរបស់គណបក្សសាធារណរដ្ឋពាក់ព័ន្ធនឹង «គ្រួសារឧក្រិដ្ឋកម្មរបស់ត្រកូល Biden» នោះ បានប្រែក្លាយទៅជាសម្ដីកុហកដ៏ឥតអៀនខ្មាស។ នេះបើយោងតាមអត្ថបទចោទប្រកាន់បើកចំហរចំនួន ៣៧ទំព័រ កាលពីល្ងាចថ្ងៃព្រហស្បតិ៍ (ទី១៥ ខែកុម្ភៈ) នៅក្នុងតុលាការសហព័ន្ធ រដ្ឋ California ដែលលើកឡើងដោយដោយរដ្ឋាពិសេសលោក David Weiss។

រដ្ឋអាជ្ញាបានសរសេរថា ហេតុផលជំរុញចិត្តឲ្យលោក Smirnov និយាយកុហកនោះ ទំនងជាមានលក្ខណៈនយោបាយ។ អំឡុងយុទ្ធនាការឆ្នាំ២០២០ ជនជាប់ចោទរូបនេះបានផ្ញើទៅកាន់អ្នកគ្រប់គ្រងរបស់ខ្លួន នៅការិយាល័យស៊ើបអង្កេតសហព័ន្ធ (FBI) នូវ «សារជាច្រើនដែលបង្ហាញពីភាពលំអៀង» ប្រឆាំងនឹងលោក Joe Biden។ អត្ថបទនៃសារដែលពោរពេញដោយអក្ខរាវិរុទ្ធ និងការបញ្ចេញសំឡេងខុស បានអួតថា រូបគេមានភ័ស្តុតាងដែលអាចឲ្យលោក Biden ជាប់ពន្ធនាគារបាន៕