រដ្ឋាភិបាលវ៉េណេស៊ុយអេឡា បានស្នើឲ្យបុគ្គលិកមកពីស្ថាប័នសិទ្ធិមនុស្សរបស់អង្គការសហប្រជាជាតិ (UN) ចាកចេញពីប្រទេស ក្នុងរង្វង់រយៈពេល ៣ថ្ងៃ ដោយនិយាយថា ខ្លួននឹងធ្វើការពិនិត្យឡើងវិញនូវកិច្ចសហប្រតិបត្តិការរបស់ខ្លួនជាមួយអង្គការនេះ។ ក្រោយមានការប្រកាសនេះ UN បានប្រាប់ថា ខ្លួននឹងវាយតម្លៃជំហានបន្ទាប់។

រដ្ឋាភិបាលរបស់ប្រទេសអាមេរិកខាងត្បូងមួយនេះបាននិយាយថា ខ្លួនបានធ្វើការសម្រេចមួយ «ដើម្បីផ្អាកសកម្មភាពនៃការិយាល័យប្រឹក្សាបច្ចេកទេសនៃឧត្តមស្នងការអង្គការសហប្រជាជាតិ (UN) ទទួលបន្ទុកសិទ្ធិមនុស្ស និងអនុវត្តការពិនិត្យឡើងវិញជារួមនៃលក្ខខណ្ឌកិច្ចសហប្រតិបត្តិការបច្ចេកទេស»។

រដ្ឋាភិបាលបាននិយាយនៅក្នុងសេចក្តីថ្លែងការណ៍មួយថា ការពិនិត្យឡើងវិញនឹងធ្វើឡើងក្នុងរយៈពេល ៣០ថ្ងៃបន្ទាប់ ដោយបន្ថែមថា បុគ្គលិក UN ទាំងអស់ ដែលជាប់ទាក់ទងទៅនឹងការិយាល័យ ត្រូវតែចាកចេញពីប្រទេសក្នុងរយៈពេល ៧២ម៉ោងបន្ទាប់។

UN បាននិយាយថា៖ «យើងសោកស្តាយចំពោះសេចក្តីប្រកាសនេះ ហើយកំពុងវាយតម្លៃជំហានបន្ទាប់។ យើងបន្តចូលរួមជាមួយអាជ្ញាធរ និងភាគីពាក់ព័ន្ធដទៃទៀត»។

ទូរទស្សន៍រដ្ឋវ៉េណេហ្ស៊ុយអេឡា កាលពីថ្ងៃពុធ (ទី១៤ ខែកុម្ភៈ) បានរិះគន់យ៉ាងចាស់ដៃលើការអធិប្បាយរបស់អ្នករាយការណ៍ពិសេសរបស់ UN ស្តីពីសិទ្ធិទទួលអាហារ គឺលោក Michael Fakhri ដែលទើបតែបញ្ចប់ដំណើរទស្សនកិច្ចទៅកាន់ប្រទេសវ៉េណេហ្ស៊ុយអេឡា។

លោក Fakhri បាននិយាយនៅក្នុងសេចក្តីថ្លែងការណ៍មួយថា កម្មវិធីស្បៀងអាហាររបស់រដ្ឋាភិបាលមិនបានដោះស្រាយបញ្ហាឫសគល់នៃភាពអត់ឃ្លានទេ ហើយងាយនឹងទទួលរងឥទ្ធិពលនយោបាយ៕