យោងតាមស្នងការសហភាពអាហ្វ្រិក (AU) សម្រាប់ការអប់រំ វិទ្យាសាស្ត្រ បច្ចេកវិទ្យា និងនវានុវត្តន៍ លោក ម៉ូហាម៉េដ ប៊ែលហូស៊ីន (Mohammed Belhocine) បាននិយាយកាលពីថ្ងៃព្រហស្បតិ៍ថា កុមារ និងយុវជនជិត១០០លាននាក់ ដែលមានអាយុចាប់ពី ៥ឆ្នាំ ដល់ ១៩ឆ្នាំ នៅទូទាំងទ្វីបអាហ្រ្វិក មិនត្រូវបានដាក់បញ្ចូលក្នុងសង្គម ព្រោះតែពួកគេមិនបានចូលរៀន ឬបោះបង់ចោលសាលារៀន។

លោក Belhocine បាននិយាយទៅកាន់អ្នកសារព័ត៌មាន ក្នុងអំឡុងពេលកិច្ចប្រជុំកំពូលសហភាពអាហ្វ្រិក ដែលធ្វើឡើងនៅទីក្រុង Addis Ababa រដ្ឋធានី ប្រទេសអេត្យូពី ថា កុមារ និងយុវជនទាំងនេះ ងាយរងគ្រោះចំពោះគ្រោះផ្សេងៗ ហើយពួកគេអាចត្រូវបានប្រើប្រាស់ដោយក្រុមភេរវកម្ម ឈ្មួញគ្រឿងញៀន និងអ្នកជួញដូរមនុស្សយ៉ាងងាយស្រួល ដោយកត់សំគាល់ថា ពួកគេភាគច្រើន បញ្ចប់ទៅនៅក្នុងបណ្តាញឧក្រិដ្ឋកម្មផ្សេងៗគ្នា ឬការធ្វើអន្តោប្រវេសន៍ ទៅកាន់ផ្នែកផ្សេងទៀតនៃទ្វីបអាហ្រ្វិក ឬចេញពីទ្វីបនេះ។

លោក បានបញ្ជាក់ពីតម្រូវការក្នុងការជួយដល់កុមារ និងយុវជនទាំងនេះ តាមរយៈការបណ្តុះបណ្តាលវិជ្ជាជីវៈ និងបច្ចេកទេស និងជួយពួកគេឲ្យទទួលបានជំនាញចាំបាច់ ដើម្បីអាចប្រកបរបរដោយខ្លួនឯងបាន។

លោកបានទទួលស្គាល់ថា ទ្វីបអាហ្រ្វិកប្រឈមទៅនឹងការបរាជ័យក្នុងការផ្តល់ការអប់រំប្រកបដោយគុណភាព ជាពិសេសនៅថ្នាក់ទាប ដែលបណ្តាលឱ្យកុមារ៩នាក់ ក្នុងចំណោម ១០នាក់ នៅអនុតំបន់សាហារ៉ាអាហ្រ្វិក មិនអាចអាន និងយល់ពីអត្ថបទធម្មតាបាន នៅត្រឹមអាយុ ១០ឆ្នាំ។

ដោយកត់សម្គាល់ថា ទ្វីបអាហ្រ្វិក ត្រូវការប្រាក់ប្រមាណ ៩០ពាន់លានដុល្លារអាមេរិក ដើម្បីទទួលបានការគ្របដណ្តប់លើការអប់រំជាសកលនៅឆ្នាំ ២០៣០ លោក បានអំពាវនាវឱ្យមានការគាំទ្រជាសកលសម្រាប់ទ្វីបនេះ ដើម្បីបំពេញគម្លាតការផ្តល់មូលនិធិ។